Semeıde 1894 jyly Varshavada jasalǵan ámııan men kóne mór tabyldy
Osydan birer jyl buryn Fedor Dostoevskıı atyndaǵy murajaıdyń qyzmetkerlerine ólketanýshy Vladımır Lýshnıkov eski ámııandy syıǵa tartady. Áýelde oǵan eshkim mán bermegen. Tek jaqynda ǵana kip-kishkentaı jádigerdi qarap otyrǵan mamandar onyń kózge baıqalmaıtyn tusta qaltarysy bar ekendigin baıqap qalady. Ol ámııannyń aldyńǵy bóligine ornalasqan. Murajaı qorynyń saqtaýshysy Tatıana Tıtaevanyń aıtýynsha, qaltarysty aqyryn ǵana tartyp qalǵan kezde, «Leonıd Dmıtrıevıch Strýkov» dep anyq jazylǵan móri shyǵa keledi. Ámııan alaqandaı ǵana dúnıe, kólemi 7h9 sm, taza teriden jasalǵan. Bir qyzyǵy onda aqsha, tıyndarmen qatar altyn buıymdardy da saqtaýǵa bolatyndaı etip jasalǵan. Sonda da ámııan ertegidegideı ǵajap bolǵandyǵy sonshalyq, ishine qansha zat salsa da syrtynan bilinbeı turady. Alaqandaı ámııanda 6 qalta bar. Al mórdiń tańbasy 120 jyl ótkenine, ári uzaq ýaqyt qoldanysta bolǵandyǵyna qaramastan jap-jańa kúıde. Sapa dep osyny aıt.
Raýshan Nuǵmanbekova.
Semeı.