Premer-mınıstrdiń orynbasary Altaı Kólginov Qazaqstan Respýblıkasynyń aýmaǵynda koronavırýs ınfeksııasynyń taralýyna jol bermeý jónindegi vedomstvoaralyq komıssııanyń otyrysyn ótkizdi. Komıssııa jumysyna ortalyq memlekettik organdardyń, «Atameken» UKP ókilderi, sondaı-aq óńirlerdiń basshylary qatysty.
Densaýlyq saqtaý mınıstri Ajar Ǵınııattyń aıtýynsha, elimizde qarasha aıynyń basynan bastap koronavırýspen syrqattanýdyń ósýi baıqalady. Táýligine KVI+ juqtyrýdyń 235 jáne KVI- juqtyrýdyń 40 jaǵdaıy tirkeledi. Keıingi aptada syrqattanýshylyq 21%-ǵa artqan (aptasyna 1 001 jaǵdaıdan 1 283-ke deıin).
«Búgingi tańda barlyq óńir – «jasyl aımaqta». Sonymen qatar 15 óńirde R kórsetkishi birlikten joǵary, bul – ınfeksııanyń taralýynyń ósýiniń belgisi. Bas memlekettik sanıtarlyq dárigerdiń qaýlysyna sáıkes R kórsetkishi 1-den joǵary bolsa, qoǵamdyq oryndarda maska taǵý usynylady», dedi A.Ǵınııat.
Vıse-premer A.Kólginov memlekettik organdardyń basshylaryna, ákimdikterge halyqty vaksınalaý jáne revaksınalaý jumystaryn jandandyrýdy, halyq arasynda túsindirý jumystaryn kúsheıtýdi tapsyr- dy.
Búgingi tańda birinshi komponentpen vaksına saldyrǵan halyqtyń úlesi 81,1%-dy quraıdy, ekinshi komponentpen vaksına alǵandar– 79,3%. Alǵashqy revaksınalaýdan 5,6 mln adam nemese tıisti halyqtyń 70%-y, qaıta revaksınalaýdan 1,1 mln adam nemese tıisti halyqtyń 51,9%-y ótti.