BAQ-ta jarııalanǵan Qazaqstan eginshiler Odaǵynyń ótinishine qatysty Aýyl sharýashylyǵy mınıstrligi qazirgi ýaqytta kúnbaǵys eksportyna eshqandaı shekteýler joǵyn habarlady, dep jazady Egemen.kz.
«2021 jylǵy qyrkúıek - 2022 jylǵy maýsym jáne 2022 jylǵy shilde-qyrkúıek kezeńderinde qoldanysta bolǵan kvotalar aıaqtaldy. Bul rette kvotalardyń mólsheri kúnbaǵys óndirisi men tutyný teńgerimi negizinde belgilendi. Kúnbaǵystyń negizgi kólemi egin jınaǵannan keıin jeltoqsannan qańtarǵa deıin eksporttalǵany eskerildi. Aldyńǵy jyldardaǵy kvotalardyń eń úlken kólemi dál osy aılarda belgilendi. 2022 jylǵy qańtar-qyrkúıekte kvotalardyń qoldanylý kezeńinde kúnbaǵys tuqymdarynyń eksporty barlyǵy 133,9 myń tonnany qurady, al 2021 jylǵy uqsas kezeńde kvotalardyń qoldanysynsyz – 113,3 myń tonna boldy», delingen Aýyl sharýashylyǵy mınıstrligi baspasóz qyzmetiniń habarlamasynda.
Osylaısha, kvotalardy engizý eksporttaýshylarǵa kúnbaǵys kólemin ótken jyldar kóleminen aspaıtyn deńgeıde áketýge múmkindik berdi, al memleketke - kúnbaǵys tuqymyna degen suranys pen álemdik baǵanyń joǵary bolýyna baılanysty kúnbaǵys maıy men qus jemine arnalǵan jem-shóp jáne kúnbaǵys kúnjarasy túrindegi (kúnbaǵys óńdeý kezindegi qaıtalama ónim) óndiristiń ishki naryǵy otandyq shıkizatsyz qalatyn jaǵdaıǵa jol bermeýge múmkindik berdi.
Qazir biz kúnbaǵys eksportyna buryn engizilgen shekteýlerdiń oń nátıjesin kórip otyrmyz. 2022 jyldyń 11 aıynda kúnbaǵys maıy óndirisi 2021 jyldyń sáıkes kezeńimen salystyrǵanda 66,6% - ǵa ósti. Eksport 204,8 myń tonnany qurady, bul 2021 jyldyń sáıkes kezeńinen 2,5 ese kóp (79,9 myń tonna). Sonymen qatar, 2021 jyly qaıta óńdeý qýaty 594 myń tonna bolatyn 3 jańa zaýyt iske qosyldy. Qazirgi ýaqytta kúnbaǵys óńdeıtin 47 kásiporynnyń jalpy qýattylyǵy 2,8 mln tonnany quraıdy.
Elimizdiń syrtqy saýda aǵyndaryn retteý, onyń ishinde shıkizat pen basqa da taýarlardyń eksportyna shekteýlerdi engizý jáne joıý jónindegi sheshimder syrtqy saýda saıasaty jáne Halyqaralyq ekonomıkalyq uıymdarǵa (HEU) qatysý máseleleri jónindegi vedomstvoaralyq komıssııanyń otyrystarynda qabyldanady. Eksporttyq baj salyǵyn engizýdiń barlyq aspektileri 2022 jyly talqylandy, Qazaqstanda О́simdik maıy óndirisiniń qazirgi jáne perspektıvalyq ósýin, ony ishki naryqta tutynýdy, maı men shıkizatqa álemdik baǵany, kúnbaǵys tuqymy ımportynyń kólemin jáne t.b. eskere otyryp, bıylǵy jyly naqty qabyldanǵan kvotalar bajdardyń ornyna engizildi.
Qazir 2023 jyldyń basynan bastap josparlanǵan kúnbaǵys eksportyna eksporttyq bajdy qoldanysqa engizý týraly buıryqtyń jobasy Ashyq NQA portalynda jarııa talqylaýda jáne eksport kólemine shekteýler kózdemeıdi.
Budan basqa, eksporttyq baj qoldanysqa engizilgenge deıin otandyq kúnbaǵys maıyn óndirýshilermen baǵany turaqtandyrý týraly memorandýmdar jasalady. Onda zaýyttan bosatý baǵasy lıtrine 750 teńgeni quraıdy.