Qazaqstan Respýblıkasy Syrtqy ister mınıstriniń orynbasary Ádil Tursynov Astana qalasyna alǵashqy jumys saparymen kelgen Túrki memleketteri uıymynyń jańadan taǵaıyndalǵan Bas hatshysy Kýbanychbek Omýralıevpen kezdesti, dep habarlaıdy Egemen.kz.
Á. Tursynov K. Omýralıevti TMU Bas hatshysy laýazymyna taǵaıyndalýymen quttyqtap, aldaǵy jaýapty qyzmetinde sáttilikter tiledi, sondaı-aq, túrki memleketteriniń TMU sheńberindegi yntymaqtastyǵynyń odan ári tereńdeı túsetindigine senim bildirdi.
Kezdesý barysynda Á.Tursynov Túrki memleketteri uıymynyń halyqaralyq róliniń artyp kele jatqanyna toqtalyp, Qazaqstannyń túrki áleminiń atajurty retinde Uıymǵa múshe barlyq eldermen jan-jaqty qarym-qatynasty damytýǵa múddeli ekenin atap ótti. Osy oraıda, Qazaqstan bastamasymen qabyldanǵan «Túrki áleminiń keleshegi – 2040» qujatyn iske asyrýǵa aıryqsha mán beretinin jetkizdi.
Qazaqstandyq dıplomat 2022 jylǵy 11 qarashada Samarqandta (О́zbekstan Respýblıkasy) ótken TMU 9-shy sammıti barysynda Prezıdent Qasym-Jomart Toqaevtyń kótergen usynystarynyń mańyzdylyǵy men ózektiligin atap ótip, qazaq tarapynyń osy baǵytta Hatshylyqtan júıeli ári jemisti jumys kútetinin aıtty.
K.Omýralıev Uıymnyń aldaǵy jumysy boıynsha josparlarymen bólisip, TMU Hatshylyǵynyń múshe memlekettermen birlese atqaryp jatqan jumystary týraly aqparat berdi.
Jumys sapary barysynda TMU Bas hatshysynyń QR Prezıdenti Q. Toqaevpen, sondaı-aq birqatar memlekettik organdar basshylarymen kezdesýleri josparlanǵan.
Túrki memleketteri uıymy (TMU) Qazaqstannyń bastamasymen 2009 jyly Nahchyvan qalasynda (Ázerbaıjan Respýblıkasy) quryldy. TMU Hatshylyǵy Ystanbul qalasynda (Túrkııa) ornalasqan. Qazirgi ýaqytta TMU-ǵa Ázerbaıjan, Qazaqstan, Qyrǵyzstan, Túrkııa jáne О́zbekstan kiredi. Majarstan men Túrikmenstan baıqaýshy mártebesine ıe.