Premer-Mınıstrdiń orynbasary Altaı Kólginovtiń tóraǵalyǵymen ótken keńeste aýyldyq eldi mekenderdi medısınalyq obektilermen qamtamasyz etý máseleleri talqylandy.
«Aýyldyq densaýlyq saqtaýdy jańǵyrtý» ulttyq jobasy aıasynda 2023-2025 jyldar aralyǵynda elimizdiń óńirleri men shalǵaı aýyldarda 655 alǵashqy medısınalyq-sanıtarlyq kómek nysany salynady. Olardyń ishinde 253 medısınalyq pýnkt, 160 dárigerlik ambýlatorııa, 242 feldsherlik-akýsherlik pýnkt bar. Mysaly, Qaraǵandy oblysynda 92 alǵashqy medısınalyq-sanıtarlyq kómek nysanyn, Abaı oblysynda 65 nysan, Jetisý oblysynda 59 nysan, Aqmola jáne Almaty oblystarynda 38 nysannan jáne t.b. salý josparlanyp otyr.
«Aýyldar men shalǵaı aýdandardyń turǵyndary oblys ortalyqtary men qalalarǵa baryp, medısınalyq kómek alý úshin shaqyrymdap jol júrýge májbúr. Bul jerde ýaqtyly medısınalyq kómek kórsetý máselesi jaıyna qalyp otyr. Aýyldar men shalǵaı aýdandar turǵyndarynyń sapaly medısınalyq kómek alýyn, onyń ishinde «altyn saǵat» ishinde kómek kórsetilýin qamtamasyz etý qajet. Osyǵan baılanysty Memleket basshysynyń tapsyrmasy boıynsha «Aýyldyq densaýlyq saqtaýdy jańǵyrtý» ulttyq jobasy ázirlendi. Josparlanǵan 655 jańa nysannyń 20-sy medısınalyq nysany múldem joq aýyldarda salynbaq. Osy ýaqytqa deıin medısınalyq nysandarǵa arnalǵan arnaıy ǵımarattary bolmaǵan aýyldarda jáne shalǵaı aýdandarda taǵy 208 medısınalyq nysan salynady. Qazirdiń ózinde apatty jaǵdaıda turǵan qoldanystaǵy nysandardyń ornyna 420-ǵa jýyq nysan turǵyzylmaq», dedi A.Kólginov.
Ulttyq jobany iske asyrý nátıjesinde shamamen 1 mln aýyl turǵynyn alǵashqy medısınalyq-sanıtarlyq kómekpen qosymsha qamtý kózdelip otyr. Sondaı-aq shuǵyl jáne mamandandyrylǵan medısınalyq kómek ýaqtyly kórsetilmek.
О́ńirlerdiń ákimdikterine jáne Densaýlyq saqtaý mınıstrligine jer ýchaskelerin bólý, olarǵa ınjenerlik-kommýnıkasııalyq ınfraqurylymdy júrgizý, 2023 jyldan bastap obektilerdiń qurylysyn bastaý tapsyryldy.