Astanada ótken birinshi Ortalyq Azııa medıa forýmynyń sessııasynda sóz sóılegen «QAZAQSTAN» RTRK AQ basqarma tóraǵasy Lázzat Tanysbaı televızııa aqparat jetkizý ádisterin ózgertkenin aıtty, dep habarlaıdy Egemen.kz.
«Jas urpaq teledıdar óldi dep qatelesedi. Bul olaı emes ekenin aıtqym keledi. Rasynda, televıdenıe ólip jatqan joq, tek aýdıtorııamyzǵa jetkizý ádisteri ǵana ózgerýde. Ǵalamtorda senimdi ári kóp kórermenge jol ashatyn kontenttiń barlyǵy – telejúrgizýshiler daıyndaǵan kontent», deıdi Lázzat Tanysbaı.
Sondaı-aq ol qazir kórermender jańalyqtardy áleýmettik jelilerden kórgendi unatatynyn aıtty.
«Kórermender kún saıyn áleýmettik jelilerdi kórgendi unatady. Biraq halyqtyń 54%-y burynǵysynsha dástúrli BAQ-qa senedi. Teledıdar birinshi orynda, kásibı veb-saıttar ekinshi orynda, al áleýmettik jeliler qazirdiń ózinde úshinshi orynda tur», dep qosty ol.