«Baı-qýatty bolaıyq» dep halqynyń júregine jol salǵan jampoz jýrnalıst Nurtileý Imanǵalıulyn bilmeıtin qazaq joq shyǵar! Aqparat salasynyń qara naryna aınalǵan biregeı tulǵa kózi tirisinde el rýhanııatyna súbeli úles qosyp, ult telejýrnalıstıkasynyń qalyptasýyna bar qajyr-qaıratyn jumsady.
Teledıdardyń aldynda Imanǵalıulyn kórýge jıylatyn jurt. Sonyń bári keshe ǵana sııaqty edi. Tersińdi eńbek, telegeı ter shúmektetip eńbek etken ol muhıt baýyrynan marjan súzgendeı myńjyldyqtardan bergi qundylyqtardy jýrnalıstik qarymy men darynyna ushtastyryp, ult perzentine aınaldy. Ǵasyr qalyptastyrǵan, jyldar somdaǵan tuǵyrly tulǵalar sapynan osylaısha oıyp oryn, teýip tuǵyr saılaǵan Nurtileý Imanǵalıulynyń týǵanyna 70 jyl tolýyna oraı «Baı-qýatty bolaıyq!» kórmesi uıymdastyryldy.
Arqa tósindegi ajarly Astanamyzdan bastaý alǵan ıgilikti is-sharanyń jalǵasy Semeı, Shymkent, Atyraý, Aqtaýda ótken bolatyn. Taldyqorǵan qalasyndaǵy M.Tynyshpaev atyndaǵy tarıhı-ólketaný mýzeıinde jyl boıy ótken kórmeniń qorytyndysy retinde uıymdastyrylǵan is-shara shymyldyǵyn Jetisý oblysynyń ákimi Beıbit Isabaev quttyqtaý sózben ashty.
«Nurtileý aǵamyz jýrnalıstıka salasynda laıyqty orny bar, ózindik súrleý-soqpaǵyn qalyptastyrǵan kánigi maman bolatyn. Onyń esimi el arasynda aıtylsa boldy, qalyń jurtshylyq Nurtileý Imanǵalıulynyń ózi júrgizgen televızııalyq týyndylaryn «Baı-qýatty bolaıyq!» dep aıaqtaıtynyn birden eske alyp jatady. Oǵan da negiz bar. Sebebi bolmys-bitimi osy uǵymmen ábden astasyp turatyndaı edi. «Betpe-bet», «Qoltańba», «Dińgek», «Kórshiler», «Zań sóılesin», «Nur-Tiley» sekildi avtorlyq habarlary kórermenniń úzbeı kóretin baǵdarlamalaryna aınaldy. Sol arqyly halyqtyń súıispenshiligine bólenip, alǵysyn arqalady. О́miriniń sońyna deıin Qazaq televızııasynyń tutas bir býynyn tárbıelep, jýrnalıstıkanyń damýyna ólsheýsiz úles qosty desem, artyq aıtqandyq emes», degen óńir basshysy óz kezeginde áriptes bolyp qyzmet etken jyldardaǵy estelikterimen bólisti.
Jampoz jýrnalıstiń adamgershilik qasıetin, parasaty men bıik ustanymyn áńgimege arqaý etti. Sonymen qatar Nurtileý Imanǵalıulynyń zaıyby Qarlyǵash Sovetbekqyzy men kórmeni uıymdastyrýǵa atsalysqan Qazaqstannyń eńbek sińirgen qaıratkeri Amantaı Berǵalıevke Alǵyshat tabys etip, ıyǵyna zerli shapan japty.
Jetisý oblysynyń mádenıet, muraǵattar jáne qujattama basqarmasynyń qoldaýymen jáne M.Tynyshpaev atyndaǵy tarıhı-ólketaný murajaıynyń bastamasymen ótken bul kóshpeli kórmege barlyǵy 200 eksponat qoıylǵan. Nurtileý Imanǵalıulynyń kózi tirisinde paıdalanǵan jeke zattary, jumys quraldary, sportta jetken jetistikteri, qyzmettik kýálikteri, kitap, saǵattary syndy jeke zattary kórermen nazaryna usynyldy.
Jıynda Atyraý oblysynyń Qurmetti azamaty Amantaı Berǵalıev, tulǵanyń zaıyby Qarlyǵash Sovetbekqyzy, «Jetisý» telearnasynyń dırektory Serik Sarybaev, memleket jáne qoǵam qaıratkeri, «Qabanbaı batyr» qorynyń tóraǵasy Kamal Abdrahmanov sóz sóılep, biregeı tulǵanyń ǵıbratty ǵumyrynan syr shertti. Al jetisýlyq aqyn Zıragúl Nurdanbekqyzy kemel oıly jýrnalıstke arnaǵan óleńin oqydy.
Aıta ketsek, atalǵan kórmeni qala turǵyndary men qonaqtary 30 jeltoqsanǵa deıin tamashalaı alady. Sonymen qatar tulǵanyń esimin týǵan jerinde máńgilik qaldyrý maqsatynda kelesi jyldan bastap ıgilikti ister qolǵa alynbaq. Aldymen maıtalman jýrnalıstiń ómiri men shyǵarmashylyǵy týraly tolymdy kitap josparda tur.
Jetisý oblysy