Bıylǵy 11-17 jeltoqsan kúnderi aralyǵynda Shymkenttegi «Otyrar» ýnıversıtetiniń sport kesheninde voleıboldan joǵary lıgadaǵy áıelder arasyndaǵy XXX chempıonattyń II týr oıyndary ótken bolatyn.
Oǵan elimizden 6 komanda qatysty. Atap aıtqanda, Shymkenttiń «Shymkent», Tarazdyń «Taraz», Oraldyń «Grasııa KZ», Aqtóbeniń «Aqtóbe», Atyraýdyń «Atyraý», Qaraǵandy oblysynyń «Elıseevskıe lastochkı» komandalary baq synasty.
Deıturǵanmen, bul synda alań ıeleri shapshańdyq tanytyp, qarsylastarynan basym ekendikterin kórsetti. Jalpy, 5 kezdesý ótkizgen jergilikti komanda 4 oıynda jeńiske jetip, tek bir oıynda ǵana ese jiberip aldy. Árbir kezdesýde Shymkenttiń voleıbolshy qyzdary jarysqa jan-jaqty daıyndalǵanyn baıqatyp, jeńiske jetý jolynda erlik jasady deýge bolady.
Sonymen II týrdyń qorytyndysy boıynsha 28 upaı jınaǵan úshinshi megapolıstiń komandasy birinshi oryn aldy. Al 24 upaı enshilegen «Taraz» arýlary ekinshi orynǵa turaqtady. Qorjynyna 19 upaı jıyp úlgergen oraldyq «Grasııa KZ» quramasy bolsa, úshinshi oryndy mise tutty. Endigi kezekte barlyq qarsylas komandalar Batys Qazaqstan oblysynyń ortalyǵy Oral qalasynda III týr oıyndarynda kezdesetin bolady.