24 jeltoqsanda Almatydaǵy Sadu Arena sport kesheninde qazaqstandyq kásipqoı boksshylardyń qatysýymen boks keshi ótedi.
Atalǵan keshte jeńil salmaqta (61,2 kılo) óner kórsetetin Abylaıhan Qusaıynov sharshy alańǵa shyǵady. Bul – qazaqstandyq bylǵary qolǵap sheberiniń úsh jyldan keıingi alǵashqy jekpe-jegi bolmaq. Otandasymyz eń keıingi ret rıngke 2020 jyldyń aqpan aıynda kóterilgen bolatyn. Meksıkanyń Tıhýana qalasynda ótken boks keshinde ol jergilikti sportshy Maýro Loretony ekinshi raýndta sulatyp salǵan edi. 2016 jyldan beri kásipqoı boksta baq synap júrgen Abylaıhan Qusaıynov búginge deıin 11 jekpe-jek ótkizip, sonyń segizinde qarsylasyn merziminen buryn utty.
Almatydaǵy jekpe-jekte A.Qusaıynov tájikstandyq Bahtovar Sagızovpen (0-3) judyryqtasady. Al boks keshiniń basty aıqasynda birinshi jartylaı orta salmaqtaǵy qandasymyz Batyr Júkembaev óner kórsetedi.