Sınoptıkter 22 jeltoqsanǵa arnalǵan aýa raıy boljamyn usyndy, dep habarlaıdy Egemen.kz.
«Atlantıkalyq sıklonnyń tereń oıpaty men atmosferalyq frontaldy bólikterdiń ótýimen Qazaqstan Respýblıkasynyń basym bóliginde azdaǵan qarly boranmen qar jaýady. Túnde shyǵystyń taýly aımaqtarynda qalyń qar jaýady. Tek respýblıkanyń batysynda, ońtústik-batysynda soltústik-batys antısıklonynyń áserinen ashyq aýa raıy saqtalady. Respýblıkanyń barlyq aýmaǵynda tuman kútiledi, ońtústikte, ońtústik-shyǵysta kóktaıǵaq, shyǵys jartysynda jeldiń kúsheıýi kútiledi», delingen Qazgıdromet habarlamasynda.
Astanada kóshpeli bult shyǵady, keı ýaqytta azdap qar jaýady. Batystan, ońtústik-batystan sekýndyna 7-12 metr jel soǵady. Aýa temperatýrasy túnde -19-21, kúndiz -17-19.
Almatyda kóshpeli bult shyǵady, keı jerlerde qar jaýady, tuman túsedi, kóktaıǵaq bolady. Soltústik-batystan sekýndyna 2-7 metr jel soǵady. Aýa temperatýrasy túnde -6-8, kúndiz -2-4.
Shymkentte kóshpeli bult shyǵady, túnniń birinshi jartysynda qar jaýady. Batystan soǵatyn jel sekýndyna 8-13 metr. Aýa temperatýrasy túnde -7-9, kúndiz -1+1.