Belgili kınorejısser Tımýr Bekmambetov 1994 jyly Reseıde qurǵan «Bazelevs» kınostýdııasyn satyp jiberdi. Stýdııanyń bas prodıýseri Lala Rýstamova men kommersııalyq dırektory Tımýr Asadov kınostýdııanyń jańa dırektory bolyp taǵaıyndaldy, dep habarlaıdy Egemen.kz.
Lala Rýstamovanyń aıtýynsha, mámile kommersııalyq sıpatta bolǵan jáne naryqtyq sharttarda jasalǵan.
«Bul mámileni jasaýǵa qarjynyń 2022 jylǵy barlyq kirisi qamtylady. Birinshi kezekte, «Elkı 9» jáne basqa fılmderden, olardy telearnalar men VOD platformalarda (onlaın kınoteatrlar, aǵyndyq jáne basqa ınternet platformalar) taratý quqyqtaryn satýdan túsken qarjylar», dedi L.Rýstamova.
Tımýr Bekmambetov Bazelevs kompanııasyn 1994 jyly qurǵan. 2004 jyly kınokompanııa Sergeı Lýkıanenkonyń romany jelisi boıynsha «Túngi kúzet» fılmin túsirdi. Fılm sol jyly eń kóp tabys ákelgen kartına atalyp, 26 mıllıon dollar jınaǵan.
Kompanııa sonymen qatar «Elkı jáne «Gorko!» sııaqty fılmder serııasyn shyǵardy. 2006 jyly Bazelevs Los-Andjeleste ókildigin tirkedi. Biraq ol jeke kompanııa sanalady.
Jańa basshynyń aıtýynsha, Bazelevs-ti Reseıde satý týraly sheshim birneshe jyl buryn bolǵan. Málimdemede Bekmambetovtiń kompanııany operatıvti basqarýdan bosap, shyǵarmashylyqqa aýysýy – rejıssýra men ssenarıılik jumystarǵa barynsha den qoıýǵa degen nıetpen jasalǵany aıtylady.