«Ádebı nasıhat pýly» jobasy – Qazaqstan Jazýshylar odaǵy men Almaty qalasy mádenıet basqarmasynyń birigip qolǵa alǵan ıgi sharasy. Onyń maqsaty – megapolıstiń ár aýdandarynda qalamgerlermen kezdesýler uıymdastyryp, ulttyq bolmysymyzǵa negizdelgen rýhanı qundylyqtardy dáripteý boldy.
Árıne, kezdesýler barysynda memlekettik saıasat pen rýhanııattaǵy jańashyldyqty nasıhattaýǵa basa den qoıyldy. Osy baǵyttaǵy jumystyń túıini qaladaǵy kitaphanalarda Almaty qalasynda turatyn aqyn-jazýshylarmen kezdesýler ótti. Mádenıet basqarmasyna qarasty qalalyq kitaphanalar jelisi uıymdastyrǵan ádebı is-shara áýeli Qazaqstan Jazýshylar odaǵynyń basqarma tóraǵasy, aqyn, Memlekettik syılyqtyń laýreaty Ulyqbek Esdáýlet jáne belgili jazýshy, halyqaralyq «Alash» ádebı syılyǵynyń laýreaty Qýandyq Túmenbaevpen kezdesýden bastaldy. Almatydaǵy Qazaqstan jazýshylary kitaphanasynda ótken kezdesýde aqyn men jazýshy oqyrmandardyń ádebıet pen mádenıet, qoǵamdaǵy basqa da ótkir taqyryptarǵa oraı qoıǵan saýaldaryna jaýap berip, qoltańba qoıylǵan kitaptaryn tartý etti. Kelesi kezekte qaladaǵy №4 kitaphanada aqyn Aqberen Elgezek pen «Qazaq ádebıeti» gazeti bas redaktorynyń orynbasary, aqyn Yrysbek Dábeı oqyrmandarmen kezdesti. Taǵy bir rýhanı áńgime Krylov atyndaǵy kitaphanada ótip, oǵan aqyndar Baqyt Bedelhan men Baǵdat Múbárak qatysty. Al jazýshy Sáýle Dosjan Almaty aýdanynyń kitaphansynda óz oqyrmandarymen kezdesse, Chehov atyndaǵy ortalyq qalalyq kitaphanada halyqaralyq «Alash» ádebı syılyǵynyń laýreaty, aqyn Zaıda Elǵondınova óleńsúıer qaýymnyń qoshemetine bólendi. Dál osyndaı taǵylymdy is-sharanyń biri №29 kitaphanada ótip, oǵan kórnekti aqyn Baýyrjan Jaqyp pen «Ádebıet» baspasynyń dırektory Ǵalym Qalıbekuly qatysty. Sondaı-aq qaladaǵy №20 kitaphanada aqyndar Jańylhan Asylbekova men Qalmahanbet Muqametqalı da oqyrmandarmen qaýyshyp, ádebıet týraly áńgime ádemi jyr keshine ulasty. Nurtas Turǵanbekpen, Araıly Jaqsylyqpen ótken oqyrmandar kezdesýine jastar kóptep jınaldy. Olar qazirgi jas býyn ádebıetshilerdiń shyǵarmashylyǵymen tanysyp, erkin áńgimege erik berdi.
– Almaty qalasy ákimdiginiń qoldaýymen Qazaqstan Jazýshylar odaǵy uıymdastyrǵan «Ádebı nasıhat pýly» atty joba aıasyndaǵy mundaı kezdesýlerdiń shyǵarmashylyq ıesine berer qýaty mol. №29 qalalyq kitaphana ujymymen jáne oqyrman jastarmen kezdesý barysynda muny anyq sezindik. Aqyn Beıbit Sarybaı júrgizgen kezdesýde oqyrmandardyń kóptegen saýalyna jaýap berip, búgingi qazaq ádebıetiniń ózekti máseleleri týraly sóz qozǵadyq, kúrkirep óleń oqydyq. Jyly shyraıly júzdesýden alǵan áser ushan-teńiz, – deıdi aqyn Baýyrjan Jaqyp.
ALMATY