El astanasynda Mádenıet jáne sport mınıstrligi uıymdastyrǵan júlde qory 46 mln teńgeni quraıtyn respýblıkalyq «Dala dauysy» shyǵarmashylyq baıqaýynyń jeńimpazdary marapattaldy. Mádenı muralardy saqtaý, qaıta jańǵyrtý, sondaı-aq dástúrli, klassıkalyq, estrada jáne teatr óneri baǵytynda jańa týyndylardy jaryqqa shyǵaratyn avtorlardy qoldaý maqsatynda ótken baıqaý bes atalym boıynsha 16 syılyqty qamtydy.
Dúbirli dodaǵa 200-den astam ótinim kelip túsken. Bul – qazaqstandyq kompozıtorlar men jazýshylardyń keıingi úsh jylda jazylǵan jáne buryn kópshilik aldynda oryndalmaǵan týyndylary.
«Baıqaý kópshilikke tyń týyndylar usynyp qana qoımaı, múldem jańa esimder ashty. Jeńimpazdar men laýreattardyń shyǵarmashylyq jumystary halqymyzdyń tarıhy men mádenıetinde mańyzdy iz qaldyryp, qazirgi mádenı landshaftyń bir bóligine aınalatynyna senimdimin. Bul jobany biz jas avtorlardyń ózderin tanytýy jáne memlekettiń qoldaýyna ıe bolý úshin dástúrge aınaldyrǵymyz keledi», dedi Mádenıet jáne sport mınıstri Dáýren Abaev marapattaý rásiminde.
Joba jeńimpazdaryn Qazaqstannyń belgili mádenıet jáne óner qaıratkerlerinen qurylǵan qazylar alqasy jabyq túrde anyqtady. Baıqaýdyń ereksheligi – qatysqan avtorlardyń da, olardyń jumysyn saraptaǵan qazylar alqasynyń quramy da sońǵy sátke deıin qupııa boldy.
Sonymen, «Úzdik klassıkalyq mýzyka» atalymymen jeke aspapqa arnalǵan «Illıýzııa» shyǵarmasy úshin Beıbit Dáldenbaı, ansamblderge arnalǵan «(Re)incarnation [Yerlik]» shyǵarmasy úshin Sanjar Báıterekov, Halyq aspaptary, úrmeli, sımfonııalyq jáne estradalyq-sımfonııalyq orkestrlerge arnalǵan «Skrıpka jáne sımfonııalyq orkestrge arnalǵan konsert» shyǵarmasy úshin Shyryn Bazarqulova marapattaldy.
Al «Úzdik mýzykalyq-teatrlyq janr týyndysy» atalymy boıynsha «Sáken» operasy úshin kompozıtor Álibı Ábdinurov, lıbretto avtory Qanat Júnisov, «Aldar kóse» baleti úshin kompozıtor Almabek Meıirbekovtiń murageri Erden Ordabekuly, lıbretto avtory Damır Orazymbetov, «Alpamys» baleti úshin kompozıtor Arman Jaıym, lıbretto avtory Aıtqalı Jaıymov úzdik dep tanyldy.
Estrada janryndaǵy «Respýblıka áni» atalymynda «Elim dep soqqan júregim» áni úshin Isa Aýǵantaı jeńimpaz atandy. Mátinin jazǵan – Saıat Raqymjan. «Úzdik folklorlyq mýzyka» atalymy avtorlyq vokaldyq-aspaptyq týyndy «Bizdiń aýyl tamasha» áni úshin Oral Baıseńgirge, avtorlyq vokaldyq nemese vokaldyq-aspaptyq týyndy «Love story» balladasy úshin Sátjan Shámenovke, avtorlyq aspaptyq shyǵarma (kúı) «Bes perishte» kúıi úshin Asylbek Kenigesovke buıyrdy.
«Úzdik dramatýrgııalyq týyndy» atalymyn dramalyq teatrlarǵa arnalǵan tarıhı nemese zamanaýı taqyryptaǵy pesa «Zor Bilgamesh hám Qorqyt Ata» shyǵarmasy úshin Asylbek Ihsanov, balalar men jasóspirimder aýdıtorııasyna arnalǵan pesa «Qashqyn» shyǵarmasy úshin Qýanysh Jıenbaı aldy.
Sonymen qatar Mádenıet jáne sport mınıstrliginiń eki arnaıy júldesin «Túrkistan» ánimen Jańabaı О́tegenov, «Meıirim kerek» ánimen Ǵalymbek Isimbergenov ıelendi.