Búgin úzdik aýyl ákimderi marapattaldy. Respýblıka boıynsha 17 aýyl basshysy úzdik dep tanyldy. Olar ózderiniń aýyldy kórkeıtýge, halyqtyń jaǵdaıyn jaqsartýǵa arnalǵan áleýmettik jobalary arqyly iriktelgen, dep habarlaıdy Egemen.kz.
Konkýrs qorytyndysy boıynsha Túrkistan oblysy Shardara aýdany Jaýshyqum aýyldyq okrýginiń ákimi Nurbaqyt Nurseıitov «Úzdik aýyl ákimi» atandy. Ekinshi oryndy Pavlodar oblysy Ýspen aýdany Novopokrovsk aýyldyq okrýginiń ákimi Vıacheslav Sımonenko, úshinshi oryndy Aqtóbe oblysy Shalqar aýdany Aıshýaq aýyldyq okrýginiń ákimi Oralbek Ábshanov ıelendi.
Sondaı-aq Shyǵys Qazaqstan oblysy Ulan aýdany Ablaket aýyldyq okrýginiń ákimi Aryslan Aglanbekov – «Úzdik sharýashyl ákim», Qaraǵandy oblysy Nura aýdany Barshyn aýyldyq okrýginiń ákimi Záýre Muhanalıeva – «Ashyq ákim», Soltústik Qazaqstan oblysy Aqqaıyń aýdany Shaǵalaly aýyldyq okrýginiń ákimi Gúlmıra Dobromırova – «Úzdik áleýmettik joba» nomınasııalarymen marapattaldy.
Gúlmıra Dobromırova aýylda qaraýsyz qalyp, qańyrap turǵan úsh qabatty ǵımaratty jóndetip, áleýmettik az qamtylǵan otbasylarǵa berýdi maqsat etken joba usynǵan. Eger joba qoldaý tapsa, Shaǵalalyda 26 otbasy páterli bolmaq.
Aýyl ákimderimen kezdesýde Memlekettik qyzmet isteri agenttiginiń tóraǵasy Darhan Jazyqbaev úzdik aýyl ákimderin óz qyzmetinde halyqtyń suranysyna saı ashyq, adal ári ádil bolýdyń mańyzdylyǵyna toqtalyp atalǵan baıqaýdyń aýyldardy damytýǵa jáne osy baǵyttaǵy jumystardy jandandyrýǵa oń septigin tıgizetindigine senim bildirdi.
Sonymen qatar aýyl ákimderine Prezıdent janyndaǵy Memlekettik basqarý akademııasynda kóshbasshylyq, sóz sóıleý, daǵdarystyq kommýnıkasııa jáne t.b. daǵdylaryn shyńdaýǵa arnalǵan arnaıy trenıngter ótkizildi.
Atap ótsek, konkýrsqa elimizdiń túkpir-túkpirinen júzge jýyq aýyldyq okrýgtiń ákimderi ótinim bergen. Uıymdastyrýshylardyń aıtýynsha, Qostanaı oblysynan 14 ákim, Soltústik Qazaqstan jáne Jambyl oblystarynan 12 ákim konkýrsqa ótinim berip, belsendilik tanytqan.