Senat Bıýrosynyń músheleri 2022 jylǵy 26 jeltoqsanda ótetin Palata otyrysynyń kún tártibin bekitti.
Aldaǵy Senat otyrysynda depýtattar «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» zań jobasyn qaraıdy.
Zań jobasynda halyqtyń áleýmettik qamsyzdandyrylýyn jaqsartý, balalardy mektepke deıingi tárbıeleý men oqytýdy uıymdastyrý jáne qamtamasyz etý, sondaı-aq aýdandardyń, respýblıkalyq mańyzy bar qalalardyń jáne astananyń ınjenerlik jelilerin, avtojoldaryn salý jáne jóndeý máselelerine qatysty normalar bar. Buǵan qosa, qujattyń mindetteri janar-jaǵarmaı materıaldaryn bólý júıesin reformalaý, «Qazaqstan halqyna» qoǵamdyq qoryna aýdarymdardy esepteý, Úkimetke elde óndiriletin, ákelinetin nemese ótkiziletin áleýmettik mańyzy bar azyq-túlik taýarlarynyń shekti baǵalaryn bekitý boıynsha quzyretter berý, sondaı-aq ózge de ózekti máseleler qarastyrylǵan.
Sonymen qatar Palata otyrysynyń kún tártibine «Qazaqstan Respýblıkasynyń keıbir konstıtýsııalyq zańdaryna ózgerister men tolyqtyrýlar engizý týraly» zań jobasy da engizildi.
Atalǵan zań jobasy sot júıesin, memlekettik rámizderdi paıdalaný tártibin jetildirýge, «Astana» halyqaralyq qarjy ortalyǵyn damytýǵa jáne onyń ıýrısdıksııasyn paıdalanýǵa baǵyttalǵan.