Ulttyq ǵylym Akademııasynyń akademıgi Dosym Súleevtiń aıtýynsha, qańtar oqıǵasynyń jańǵyryǵy áli basylǵan joq. Qańtarda oqqa ushqan bozdaqtyń anasynyń, jarynyń joqtaýynyń ashy zary áli qulaǵymyzdan alystamady.
Memleket basshysy Qasym-Jomart Toqaev Almaty qalasyna jumys saparymen baryp, qańtar oqıǵasynyń qurbandaryna arnalǵan «Taǵzym» memorıalynyń ashylý rásimine qatysty.
«Táýelsizdigimizdiń altyn besigi – Almatynyń qatty zardap shekkenin kózben kórdik janymyz qınaldy. 1986 jyly jeltoqsanda qazaq jastarynyń qany tógilgen qasıetti alańda kúshtik qurylymdarǵa shabýyl jasalyp, qarý-jaraq qoımalaryn tonady. Memlekettilikti qalyptastyrý tarıhynda ózindik orny bar keshegi jaqsylardyń, Dımekeńniń tabanynyń izi qalǵan Almatynyń Aqordasynyń otqa oranýy kez-kelgen qazaqty beı-jaı qaldyra almady. Qıraǵan dúnıeni qalpyna keltirýge bolatyny, biraq úzilgen ómir qaıta jalǵanbaıtyny belgili. Biraq sol sátte abdyrap, ýaqyt uttyrýǵa esh qaqymyz bolmaǵanyn, qabyldanǵan sheshimder, qatal bolsa da memlekettilikti saqtap qalýǵa sebep bolǵanyn qabyldaý qıyn bolsa da qazir túsinip júrmiz», deıdi Dosym Súleev.
D. Súleev aıtyp ótkendeı, mundaı oqıǵa eshqashan qaıtalanbaýy úshin, sol bir azaly kúnderdi bastan ótkergenimiz urpaq jadynda máńgilik jańǵyryp turýy tıis degen oı «Taǵzym» memorıalymen birge soǵylǵandaı áser qaldyrdy.
«Táýelsizdik kúshin kúrestiń kúni búginge deıin jalǵasyp kele jatqanyn eske salyp turatyny bizdiń sanamyzda ǵana emes, eskertkishterde de tańbalanyp turýy tıis. «Taǵzym» memorıaly qańtar oqıǵasynyń epısentri bolǵan jerde salynǵany kóptiń oıynan shyqty. Onyń qańtar qurbandaryn eske alatyn, sondaı-aq halqymyzdyń danalyǵyn, batyldyǵy men kúsh-qýatyn kórsetetin orynǵa aınalatyna men senemin. Eskertkishtegi birneshe tústen turatyn tórt emosıonaldy-arhıtektýralyq bólik – aqshyl sur bóligi eńserýdi, qara tús qańtar oqıǵasy kezindegi dúrbeleń men úreıdi beıneleıdi, al sur bóligi - qurban bolǵandar men tógilgen qannyń, adam shyǵynynyń sımvoly, aq tús turaqtylyq pen damýǵa umtylý, memlekettiń bolashaǵyna degen senimdi aıshyqtap tur», deıdi akademık.
Qańtar oqıǵasy eń aldymen, ekonomıkalyq máselelerge baılanysty oryn aldy. Muny teńsizdikke, naqty kiristerdiń tómendeýine jáne resýrstardyń ádiletsiz bólinýine halyqtyń qarsylyǵy dep baǵalaýǵa bolady. 10 jyldan astam ýaqyttan beri qordalanyp kele jatqan másele-tin. Biraq sheshýi tıis máselelerdiń sheshýdiń keıingi qaldyryla berýi orny bolmas memlekettiliktiń birtutastyǵyna qaýip tóndirgen qasiretke ulasa jazdaǵanyn kózben kórdik.
«Memleket basshysynyń táýelsizdik alǵaly beri elde áleýmettik, bıznes, ekonomıka jáne ulttyq baılyqty ıgerý salasynda qalyptasqan, tamyry tereńge ketken problemalardy, ashyq aıtyp, qordalanǵan máselelerdi aldaǵy ýaqytta tıisti dárejede sheshiletinin basa kórsetýi kóńilge senim uıalatady. El taǵdyryna áser etken saıası oqıǵalar halyqtyń júreginde ǵana emes, sáýlet ónerinde de qalady. Memleket basshysy Qasym-Jomart Toqaevtyń qatysýymen ashylǵan eskertkish Qańtar oqıǵasyn eske salyp turady dep úmittenemin», deıdi Dosym Súleev.