Astana qalasynyń ákimi Jeńis Qasymbek Instagram paraqshasynda bıylǵy oqý jylynda 9 mektep qoldanysqa beriletinin aıtty, dep habarlaıdy Egemen.kz elorda ákimdiginiń resmı saıtyna silteme jasap.
«Oqý oryndarynyń qurylys barysymen tanystym. Bıylǵy oqý jylynda taǵy 9 mektepti qoldanysqa beremiz. Máselen bul Rysqulov kóshesindegi, R.Qoshqarbaev dańǵylyndaǵy, Uly Dala dańǵyly men Saýran kóshesiniń qıylysyndaǵy, Uly Dala dańǵyly men №39 kósheniń qıylysyndaǵy jáne t.b. mektepter. Kóktemde irgeles aýmaqty abattandyrýǵa kirisýdi tapsyrdym», dep jazdy J.Qasymbek.
Ákimniń aıtýynsha, aldaǵy oqý jylynda taǵy 13 mektep salynady. Mundaı mekteptiń árqaısysy 4 myń oqýshy ornyn (2 aýysymda) ashýǵa múmkindik beredi. Osylaısha oqýshy oryndaryna degen qajettilik máselesi edáýir sheshiledi.
Sol sııaqty Memleket basshysynyń tapsyrmasy boıynsha «Jaıly mektep» ulttyq jobasy aıasynda 100 myń oqýshy ornyna (2 aýysymda) arnalǵan jańa formattaǵy 25 mektepti jobalaý jumysy júrgiziledi. Jańa formattaǵy mektepterdiń qurylysy 2023 jyly bastalady.
«Balabaqsha máselesine de kóńil bólemiz: jaqynda Esil aýdanynda (Kúltegin kóshesi) memlekettik balabaqsha ashyldy. Sol sııaqty keler jyly jeke balabaqshalarǵa 9 myń orynǵa arnalǵan qosymsha memlekettik tapsyrys ornalastyrýdy josparlap otyrmyz, osy arqyly balalardy mektepke deıingi bilimmen qamtý kólemin arttyramyz», dep jazdy elorda ákimi.