Birikken Arab Ámirliginiń Shardja qalasynda sadaq atýdan Azııa kýboginiń úshinshi kezeńi óz máresine jetti. Bul synda qazaqstandyq sportshylar bir altyn, bir kúmis jáne eki qola medal jeńip aldy.
Sary qurlyq básekesiniń sońǵy kúninde qazaqstandyq Ilfat Abdýllın jekeleı básekeniń (klassıkalyq túrinen) fınalynda bangladeshtik Muhammed Hákim Ahmet Rýbeldi 6:4 esebimen jeńip, jarys jeńimpazy atandy. Sondaı-aq quramynda Ilfat Abdýllın, Dáýletkeldi Jańbyrbaı men Sanjar Musaev bar Qazaqstannyń erler komandasy (klassıkalyq saıys) qola júlde úshin ótken básekede Bangladesh sadaqshylaryn 6-2 esebimen tize búktirip, Azııa kýboginiń qola júldesine ıe boldy.
Al jarystyń alǵashqy kúninde quramaly sadaqpen (Compound bow) nysana kózdeýde Qazaqstan quramasy 1 kúmis jáne 1 qola medal oljalady. Osylaısha, jerlesterimiz sadaq atýdan Azııa kýboginiń úshinshi kezeńin 1 altyn, 1 kúmis jáne 2 qola medalmen qorytyndylap, jalpykomandalyq esepte 4-orynǵa taban tiredi.