«Ǵylym ordasynda» Qazaqstannyń eńbek sińirgen ǵylym qaıratkeri, «Qurmet» ordeniniń ıegeri, II Dúnıejúzilik soǵys ardageri, bıologııa ǵylymdarynyń doktory, professor Zulqarnaı Seıitovtyń 100 jasqa tolýyna arnalǵan mereıtoılyq shara ótti.
Alqaly jıynnyń ashylýynda merekelik sharany uıymdastyrǵan Qazaqstan-Reseı medısınalyq ýnıversıtetiniń rektory Nurlan Jaınaqbaev quttyqtaý sóz sóıledi.
«Ǵalymnyń júrip ótken jolyn, eńbekterin elimiz ǵana emes, dostastyq elderi de ǵıbratty esteliktermen eske alatyny sózsiz», dedi Nurlan Jaınaqbaev.
Jıyn barysynda Qorǵanys mınıstriniń orynbasary, general-leıtenant Muhamedjan Talasov mınıstrdiń arnaıy quttyqtaý hatyn oqyp, Zulqaınar Seıitulyna «El qorǵany» medalin tabys etti.
«Ot pen oqtyń arasynan aman kelip, ǵylym jolyna sanaly ǵumyryn arnaǵan ǵalymnyń etken eńbegi, jetken jetistigi búgingi jas urpaqqa úlgi-ónege», dedi óz sózinde M.Talasov.
Jıynǵa kelgender professor Zulqarnaı Seıitovtyń ómir jolyna qatysty fılm kórip, aǵylshyn tilinde jaryqqa shyqqan «Biochemistry» eńbegimen tanysty. Bul eńbek ótken ǵasyrdyń 80-shi jyldary orys, keıinnen qazaq tilinde jaryq kórip, ǵylymı qaýymdastyq tarapynan joǵary baǵasyn alǵany belgili. Osy eńbegi úshin professor «Platınaly Tarlan» syılyǵymen marapattalǵan.
Ǵalymnyń bul eńbegin «klassıkalyq, medısınalyq eńbek» dep atap ótken M.Aıthojın atyndaǵy Molekýlalyq bıologııa jáne bıohımııa ınstıtýtynyń bas dırektory, bıologııa ǵylymdarynyń doktory, professor Kamalıden Sharıpovtyń aıtýynsha, qazaq halqynyń basynan keshken náýbet jyldardy, II Dúnıejúzilik soǵys jyldaryn basynan ótkerip, ulttyq ǵylym isiniń damýyna áli kúnge deıin úles qosyp kele jatqan ardager-ǵalym Zulqarnaı Seıitovtiń bul eńbegi jahandyq syn-tegeýrinderdi basshylyqqa alady. Aǵzadaǵy zat almasý úrdisinen bastap, júıke júıesi, dáneker ulpasy, baýyr bıohımııasyn sıpattaıtyn «Bıohımııa» eńbegin Qazaqstan-Reseı ýnıverstıteti aǵylshyn tilinde jaryqqa shyǵaryp otyr.
«Bıohımııa» eńbeginiń avtory búginde elimiz ǵana emes sheteldiń ǵylymı qaýymdastyǵyna ulttyq sýsyndardyń paıdasy, «Qazaq balzamdary» men «Altynsý» emdik sýsyndarymen keńinen málim. Ol dúnıe júzinde alǵash ret bıologııalyq qasıetterin saqtaı otyryp, qymyz ben shubatty daıyndaý jáne uzaq ýaqytqa deıin saqtaý tehnologııasyn, sonymen qatar bıe, túıe sútin qurǵaqtaı paıdalaný ádisterin dáleldedi.
Jıynda mereıtoı ıesine zor qurmet kórsetilip, jyly lebizder aıtyldy.
ALMATY