«QazMunaıGaz» ulttyq kompanııasy» AQ basqarma tóraǵasy Maǵzum Myrzaǵalıev «Abu Dhabi Ports» holdınginiń bas dırektory Mohamed Djýma Al-Shamsımen kezdesý ótkizdi. Kezdesý ulttyq kompanııa basshysynyń Birikken Arab Ámirlikteriniń astanasy Abý-Dabıge jumys sapary aıasynda uıymdastyryldy.
Sapar barysynda Maǵzum Myrzaǵalıev «Abu Dhabi Ports» kompanııasynyń basty porty – 2012 jyly paıdalanýǵa berilgen Khalifa tereń teńiz portyna, sondaı-aq teńiz operasııalaryn qoldaý bazasyna bardy.
Kezdesýde taraptar teńiz jáne jaǵalaýdaǵy júk tasymaly, Kaspıı aımaǵyndaǵy saýda flotyn damytý jáne ınvestısııa tartý salasyndaǵy ekijaqty yntymaqtastyqtyń perspektıvalaryn talqylady.
Sonymen qatar «QazMunaıGaz» ben «Abu Dhabi Ports» Kaspıı teńizindegi iri teńiz munaı-gaz jobalaryna qyzmet kórsetý boıynsha yntymaqtastyq ornatý múmkindikterine toqtaldy.
Eske sala keteıik, «Abu Dhabi Ports» – Birikken Arab Ámirlikteriniń port, ónerkásiptik jáne logıstıkalyq operatory. Onyń qorjynynda iri kásiporyndar bar. Sondyqtan ol óńirdegi iri holdıngtik kompanııalardyń biri bolyp sanalady. Sondaı-aq kompanııa Abý-Dabıdiń ártaraptandyrylǵan ekonomıkasynyń negizgi sektorlaryn qamtyp otyr.
«Abu Dhabi Ports» BAÁ men Gvıneıada 11 port pen termınalǵa (konteınerlik, jalpy júkter, Ro-Ro, krýızdik), sondaı-aq 550 sharshy shaqyrymnan astam óndiristik aımaqtarǵa ıelik etedi ári basqarady. Bul saýdany jeńildetip, Abý-Dabıdi búkil álemmen baılanystyrady. Port klasterinde Abý-Dabı, Zaıed, Halıfa, Mýsaffa, Mýharrak, Sıla jáne basqa da porttar bar.