BAIаNDY BASTAMA – ÚLGILI ÚRDIS

О́mirge ińkár sezimmen qaraý, bastamashyldyqqa umtylý qashanda jastarǵa tán, jastyqqa jarasymdy. Jasyndaı jarqyldaıtyn jastyq jigerdiń almaıtyn qamaly joq. Sondyqtan ǵoı Prezıdent Nursultan Nazarbaevtyń jastardy qoldap, olardy el bolashaǵynyń erteńgi tizgin qaǵarlary retinde baǵalap kele jatqany. Elbasy óziniń “Jańa onjyldyq – jańa ekonomıkalyq órleý – Qazaqstannyń jańa múmkindikteri” atty bıylǵy Qazaqstan halqyna Joldaýynda: “Úshinshiden, ekonomıkalyq órleý – árqaısymyzǵa qatysty búkilhalyqtyq is. Bul – qoǵamnyń áleýmettik máselelerin sheshý jáne barshamyzdy tabysqa bastaýdyń kilti” degen bolatyn. Al mundaı búkilhalyqtyq isten jastardyń tys qalýy múmkin be, múmkin emes. Bul – urpaqtan urpaqqa jalǵasyp kele jatqan ómirsheń úrdis. Aqtóbelik jastardyń “Aýyldyń gúldenýi – Qazaqstannyń gúldenýi” aksııasyna bastamashyl bolýy da osyndaı órkendi ónegeniń jemisi. Jyl basynda “Nur Otan” HDP Aq­tóbe fılıaly “Jas Otan” jas­tar qanatynyń belsendi músheleri shalǵaıdaǵy eldi mekenderdi abat­tan­dyrýǵa, áleýmettik mekemelerdi salý men olardy jóndeýge atsa­ly­sýǵa bastama kótergen bolatyn. Baıandy bastamany oblys jastary ilip áketti, ol Memleket basshysy Nursultan Nazarbaev tarapynan da qyzý qoldaý tapty. Oń bastama kóp uzamaı-aq respýblıka jastarynyń keń aýqymdy aksııa-estafetasyna aınaldy. Tek oblystyń ózinde ǵana stýdentter men qurylys jasaǵy jalaýynyń astynda 70 myńnan astam jas birikti. Oblys ákimdigi aldyndaǵy alań­da ótken “Aýyldyń gúldenýi – Qa­zaq­stannyń gúldenýi” jastar ma­ra­fon-estafetasynyń saltanatty mı­tıngisine 20 myńnan astam jas jınaldy. Osymen bir mezette aýdan ortalyqtary men aýyldyq okrýgterde 30 myń aýyl jasy bas qosqan mıtıngter uıymdas­ty­ryl­dy. Aqtóbe oblysynda jumys sapa­rymen júrgen “Nur Otan” HDP tóraǵasynyń birinshi orynbasary Nurlan Nyǵmatýlın týǵan ólkeni gúldendirýge jumylǵan oblys jas­tarynyń forýmynda sóz sóılep, qatysýshylarǵa izgi tilegin bildirdi, el ıgiligine baǵyttalǵan bastamaǵa qatysýshylarǵa sát sapar tiledi. – Táýelsizdiktiń 20 jyldyǵy­men oraılastyrylǵan qalalardy jáne aýyl-aımaqty kóriktendirý-kórkeıtý aksııasy aqtóbelikterdiń bastamasy­men búkil el aýmaǵynda ótkizilýde. Bul bastama Memleket bas­shysy, “Nur Otan” HDP Tór­aǵa­sy Nursultan Nazarbaev tara­py­nan da qoldaýǵa ıe boldy. Aýqym­dy joba tek aımaqtardyń tazalyǵyn retke keltirip qana qoı­maıdy, jas ur­paqty otansúıgish­tik­ke tárbıeleýi­men de mańyzdy, – dedi ol. Jastar qozǵalysyn uıymdas­ty­rý­shylarǵa alǵysyn jetkizgen ob­lys ákimi Eleýsin Saǵyndyqov kez kelgen memlekette jastar qoǵam­nyń qozǵaýshy kúshi ekenine basa nazar aýdardy. Oblys basshysynyń málimdeýinshe, stýdentter men jastardyń qurylys jáne “Jasyl el” jasaqtary, mektep oqýshy­lary­nyń otrıadtary, qala jáne aýdan jas­tary 385 eldi mekendegi saıa­baqtar men skverlerdi kórkeıtip, gúl egedi, kógaldandyrady. Aýmaǵy 2200 gektar ózen-kól jaǵasyn ta­zartý jáne kógaldandyrý men sanı­tarlyq tazalaý júrgiziledi. Uzyn­dyǵy 980 shaqyrym orman alqap­taryn qoqys pen qýraǵan shóp­ter­den tazartyp, jol boıy kógaldan­dyrylady. Qurylys jasaqtary jáne jastardyń qatysýymen 200-den astam áleýmettik nysandar boı kóterip, jóndeý júrgiziledi. Aýyl­dar­da 216 jańa sport keshenderi men ózge de nysandar paıda bolady. – Bul bastamaǵa óz eńbegimen úles qosýǵa tilek bildirýshiler kó­beıe túsýde. Burynǵy belgilen­gen­nen basqa taǵy da 10 mektep, 18 balabaqsha, 15 densaýlyq saqtaý me­kemesi salynady jáne jón­deledi, – dedi oblys basshysy. Eleýsin Naýryzbaıuly atalǵan nysandardaǵy eńbek tolyqqandy júzege asyrylýy úshin barlyq jaǵdaı jasalǵanyn, sonyń ishinde jumyspen qamtamasyz etý, jalaqy tólemine kepildik, kólikpen alyp júrý, tamaq jáne ózge de kerek-jaraqtardy uıymdastyrý basty nazarda ekendigin jetkizdi. Buǵan deıin oblys basshysy jastar marafon-estafetasynyń qorytyndysy boıynsha eń úzdik degenderge 50 jeńil avtokólik pen 1000 noýtbýk jáne Astana qala­syna 2000 joldama tabys etiletinin aıt­qan bolatyn. Mıtıngte sóı­le­gen kezinde jastardyń qulshynysy men jumys aýqymyn saralaı kele, taǵy da on avtokólik bólýdi shesh­kenin málimdedi. Jastar dýyldatyp ún qosty. Saltanatty mıtıngte “Jasyl el” jasaǵy men orta mektep jáne stý­dentter qurylys otrıady, son­daı-aq, jumysshy jastar atynan Aqtóbe memlekettik pedagogıkalyq ınstıtýty stýdenttik-qurylys jáne “Jasyl el” otrıadynyń koman­dıri Bıbigúl Aqjigitova, Aqtóbe ferroqorytpa zaýyty jas mamandar keńesiniń tóraǵasy Erlan Nazarov jáne basqalar sóz sóılep, bul bastamany ónimdi eńbekpen baıandy etetinderine sendirdi. El úshin, Elbasy úshin eńbek vahtasyn tabysty júrgizetindikterin jetkizdi. Soǵys jáne eńbek ardageri Sultan Dosmuratov jastardy aǵa urpaqtyń úlgi-ónegesin osylaı sátti jalǵas­tyra berýge shaqyrdy, aýyldardy kórkeıtýge attanyp bara jatqan jastarǵa sáttilik tiledi. Budan keıin “Nur Otan” HDP Tóraǵasynyń birinshi orynbasary Nurlan Nyǵmatýlın men oblys ákimi Eleýsin Saǵyndyqov Aqtóbe qalasy men oblystyń 12 aýdanyn­daǵy jastar ókilderine saltanatty túrde eńbek joldamasyn tabys etti. Oblys jastarynyń “Aýyldyń gúldenýi –Qazaqstannyń gúldenýi” atty marafon-estafetasynyń bas­talýyna arnalǵan sharaǵa qatysý­shy­lar osy sátte qanattas ótip jat­qan Muǵaljar aýdanyndaǵy jastar mıtıngisin tikeleı jelide kórdi. Saltanatty sharanyń sońynda Aqtóbe jastarynyń Qazaqstan jastaryna úndeýi oqyldy. Mıtıng jastar marafon-estafetasynyń ánuranyna aınalǵan “Atameken” ánin sharaǵa arnaıy shaqyrylǵan Qazaqstan Respýblıkasynyń eńbek sińirgen ártisi Eskendir Hasanǵa­lıev­tiń ózi oryndady. Jıynnan jigerlenip shyqqan jastar qalalar men aýyldardy abattandyrýǵa attanyp ketti. Satybaldy SÁÝIRBAI, Aqtóbe oblysy.