4 qańtar saǵat 02:30-dan bastap Almatyda qar jaýa bastady, dep habarlaıdy Egemen.kz ákimdiktiń baspasóz qyzmetine silteme jasap.
«Tańǵy saǵat 08:00-ge deıin taýly aımaqtarda 15-18, qalada 10, al Shymbulaqta qar qalyńdyǵy 60 sm-ge jetti. Sınoptıkterdiń eskertýimen qar jaýa bastaǵanǵa deıin qalanyń barlyq aýdandarynda qumshashqysh mashınalardyń kezekshiligi uıymdastyryldy. Kóshelerge kóktaıǵaqqa qarsy materıaldar sebilip jatyr, 2274 tonna materıal paıdalanyldy», delingen habarlamada.
Trotýarlardy, qoǵamdyq kólik aıaldamalaryn, jaıaý júrginshiler jolyn, kólik turaqtary men qoǵamdyq oryndardy tazalaý jumystary júrgizilip jatyr. Tańǵy 06:00-den bastap patrýldik polısııanyń kómegimen qar tazalaýshy kólikterden 17 kolonna iske kiristi. 32 qar tasymaldaýshy kólik pen 70 samosvaldyń kómegimen qar shyǵaryldy.
Túngi ýaqytta 516 arnaıy tehnıka, onyń ishinde 152 qumshashqysh, 204 tazalaýshy tehnıka men 367 jumysshy tazalaý jumystaryn júrgizdi. Tańnan beri qala kóshelerinde 524 arnaıy tehnıkamen 1240 jumysshy qyzmet etip jatyr.
Aýdandyq ákimdikter men merdiger uıymdarda jumystardy júrgizý boıynsha táýlik boıy kezekshilik uıymdastyryldy.
«Qazgıdromet» RMK boljamyna sáıkes 4 qańtar kúni kúndiz qalada aýa temperatýrasy -2..-4°S quraıdy, qar jaýyp, 2-7 m/s jyldamdyqtaǵy jel turady.