Almaty oblysy polısııa departamentiniń burynǵy basshysy, general-maıor Serik Kúdebaev sotqa tartyldy, dep habarlaıdy Egemen.kz. Bul aqparatty Jetisý oblystyq sotynyń baspasóz qyzmeti rastady.
«Qazirgi tańda sot S.Kúdebaevtyń isin qarap jatyr. Prosess Taldyqorǵan qalalyq sotynda ótip jatyr», dedi Jetisý oblystyq sotynyń baspasóz qyzmetiniń jetekshisi Nursultan Orynbasarov.
Onyń aıtýynsha, bastapqyda sot jabyq esik jaǵdaıynda ótýi tıis bolǵan, keıin «ashyldy».
Eske salaıyq, Serik Kúdebaev Almaty polısııa departamentin 7 jyl basqarǵan. 2020 jyly Almaty oblysy polısııasynyń basshysy bolyp taǵaıyndaldy. Qańtardaǵy tártipsizdikterden keıin ol qyzmetinen bosatyldy.
Búgin Májiliste qańtar oqıǵasy týraly jańa derekti fılm kórsetildi. Kadrlarda sol kezde Almaty oblysynyń polısııa basshysy qyzmetin atqarǵan Serik Kúdebaevtyń ózi kúzetýi tıis departament ǵımaratynan qarýly kúzetshilermen qalaı shyǵyp ketkeni kórsetilgen.
«Qańtar oqıǵasy kezinde birqatar oblystarda UQK jergilikti bólimsheleri men ishki ister departamentteriniń basshylary qaramaǵyndaǵylarǵa jumys oryndarynan ketýge buıryq berdi. Mysaly, myna kadrlardan Almaty qalasy IID burynǵy bastyǵynyń qalaı áreket etkenin kórýge bolady. Sol kezde komendant bolǵan Serik Kúdebaev polısııa ǵımaratynan shyǵyp ketedi», delingen vıdeonyń sıpattamasynda.
Mamyr aıynda Bas prokýratýra Almaty oblysy polısııa departamentiniń burynǵy basshysy Serik Kúdebaevtyń qańtar oqıǵasyna qatysy baryn habarlady. Sotqa deıingi tergep-tekserý Qylmystyq kodekstiń 370-babynyń 4-bóliginiń 1-tarmaǵy «Aýyr zardaptarǵa ákep soqqan qyzmettegi áreketsizdik» boıynsha júrgizildi.