2023 jyldyń 5 qańtar kúni Qazaqstannyń túkpir-túkpirinen kelgen 300-den astam úzdik sportshy «Dala qyrandary» ortalyǵynyń ashylýyna qatysty.
Jas uıymnyń qolǵa alǵan mańyzdy jumystarynyń biri – elimizde jastar qozǵalysynyń ortalyqtaryn ashý. Alǵashqy ortalyq Astana qalasynda paıdalanýǵa beriledi. Bul jerde kovorkıng, jattyǵý zaldary, dárishanalar jáne kitaphana bolady, ıaǵnı jastardyń jan-jaqty damyp, olardy tıimdi komandaǵa biriktirý úshin jaǵdaı jasalmaq. Búgingi tańda jasampazdyq úderis úshin qazaqstandyq jastardy biriktirý asa mańyzdy. Osyǵan oraı, elimizdiń bedeldi sportshylary birlesip, jastar qoǵamdyq birlestigin qurǵan bolatyn. Maqsat – belsendi jastardyń basyn bir shańyraqtyń astynda biriktirip, olardyń jan-jaqty damýy úshin jaǵdaı jasaý.
Is-sharaǵa «Dala qyrandary» jastar qozǵalysynyń joba úılestirýshisi Erbol Myrzabosynov, erkin kúresten London Olımpıadasynyń qola júldegeri Aqjúrek Tańatarov, qazaq kúresinen «Qazaqstan barysy – 2014» jáne «Dala qyrany» tıtýlynyń ıegeri Muhıt Tursynov, MMA sheberi Artem Reznıkov, grek-rım kúresinen Álem chempıonatynyń birneshe dúrkin júldegeri Almat Kebispaev jáne taǵy basqa elimizdiń tanymal sportshylary qatysty.
Sharada sóz alǵan sportshylar salada oryn alyp otyrǵan kemshin tustar týraly aıtyp berdi. Atap aıtqanda, erkin kúresten Qazaqstannyń tórt dúrkin chempıony, halyqaralyq birinshilikterdiń birneshe dúrkin jeńimpazy Aqjúrek Tańatarov óz sózinde sporttaǵy qıyndyqtar jaıly sóz qozǵady.
«Bul jerde kásibı sportshylar men sportty aıaqtaǵan azamattar jınalyp otyr. Elimizde biraz sportshylar qıynshylyqtan ótti. Bireý aıtsa, bireý aıta almas, biraq Qazaqstandaǵy eń ózekti máseleler qordalanǵan salalardyń biri – ol sport salasy. Ásirese, kúreste biraz ádiletsizdikter boldy. Syrttan legıonerlerdi ákelip, sol sportshylardyń jeńiske jetip, onyń úlken jarystarǵa barýyna barlyq jaǵdaı jasaldy. Osylaısha, elimizdiń biraz sportshylarynyń baǵy baılandy. Osy jaǵdaılar óz basymyzdan ótkennen keıin sportshylardyń muń-muqtajyn tyndap, qoldaý kórsetýge daıynmyz», dedi ol.
Al grek-rım kúresiniń sańlaǵy Almat Kebispaev jıyn qatysýshylaryna bir maqsat qoıyp, oǵan birlesip qol jetkizý kerektigin aıtty. Ol memlekettiń qoldaýyn sezinip, mansabynda nebir qıyndyqtarmen arpalysýǵa altyn ýaqytyn zaıa ketirmegen sportshylardyń elimizge tórtjyldyqtyń altynyn da, kúmisin de ákeletinine nyq senimdi ekenin jetkizdi.
«Elimizde sportqa búıregi burǵan jastar az emes. Degenmen, olardyń birqatary ýaqyt óte kele sporttan ketýge májbúr bolady. Máselen, jasóspirimderdiń jartysy ǵana jastar tobyna ótse, solardyń úshten biri ǵana keıin eresekter arasynda saıysqa túsip júr. Bul saladaǵy kóptegen júıeli problemalardyn biri. Túrli deńgeıdegi jarystar ótkizip, esep berýden bólek, salanyń kúrdeli máselelerin sheshý qajet. Sonda ǵana otandyq sportymyz alǵa basyp, jazǵy Olımpıadada kók týymyz jelbireıdi», dedi Almat Kebispaev.
Jıyndy qorytyndylaǵan jastar qozǵalysynyń úılestirýshisi Erbol Myrzabosynov sport salasynda reforma júrgizý qajettigin jáne bul jumysqa sportshylardyń tikeleı ári belsendi túrde qatysýy kerektigin alǵa tartty.
«Sizderdiń barlyqtaryńyz sanaly ómirin sportqa arnaǵan jastarsyzdar. Sportta qandaı ózekti máselelerdiń bar ekeninin sizderden artyq eshkim bilmeıdi. Salada júıeli problemalar bar ekeni ras. Sondyqtan da biz otandyq sportty reformalaýdy basty mindetterimizdiń biri retinde kórip otyrmyz. Bul kúrdeli máselelerdi tek birlesip qana sheshe alamyz. Sebebi, sport – ol biz! Sizderdi bul iste belsendi bolýǵa shaqyramyn», dedi Erbol Myrzabosynov.
Spıkerdiń aıtýynsha, elimizdiń túkpir-túkpirinen kelgen sportshylar endi óz óńirindegi máselelerdi jýyrda iske qosylǵan telegram-botqa jibere alady. Barlyq aqparat óńdelgennen keıin arnaıy kartaǵa engiziledi. Aqyr sońynda bar aqparat otandyq sportty reformalaý maqsatynda jasalatyn «Jol kartaǵa» engizilip, ol keıin Mádenıet jáne sport mınıstriligine jiberiledi. Qazirgi ýaqytta atalmysh kartany jasaıtyn arnaıy sarapshylardyń toby qurylýda.
Is-shara sońynda elimizdiń belsendi jastary bolashaq ortalyqta bolyp, qurylys jumystarynyń bastalýyna bastamashy boldy. Osylaısha, kásibı sportshylar el jastaryna demeý bolatyn ortalyqtyń boı kóterýine ózderiniń shaǵyn úlesterin qosty.