Ústel tennısinen Qazaqstan ulttyq quramasy álem chempıonatynyń joldamasy sarapqa salynatyn Azııa aımaqtyq irikteý kezeńine qatysady.
Qatardaǵy irikteý saıysynda Qazaqstan quramasynan ústel tennısi sportynyń úzdikteri Kırıll Gerasımenko men Alan Qurmanǵalıev, sondaı-aq Aıdos Kenjeǵulov, Iskender Harkı, Záýresh Aqasheva, Sarvınoz Mırkadırova, Anastasııa Lavrova, Aııa Álimbaeva jáne Angelına Romanovskaıa synǵa túsedi. Týrnır 7-13 qańtar aralyǵynda ótedi. Jerlesterimiz jekeleı synda, jupta jáne aralas básekelerde joldamalar úshin talasady.
Al álem chempıonaty osy jyldyń 20-28 mamyr aralyǵynda Ońtústik Afrıkanyń Dýrban qalasynda uıymdastyrylady. Ońtústik Afrıka Respýblıkasy tarıhta alǵash ret ústel tennısinen álem chempıonatyn qabyldaıtynyn aıta ketken jón. Afrıka qurlyǵynda atalǵan sport túrinen álem birinshiligi sońǵy ret 1939 jyly Mysyrda ótken eken.