2022 jyly eksporttaýshy kompanııalarǵa shyǵyndardy óteýge bólingen qarajat kólemi ótken jylmen salystyrǵanda 2,8 ese ulǵaıyp, 8,8 mlrd teńgeni quraǵan. Sol sııaqty 2021 jyly 306 ótinim maquldansa, 2022 jyly onyń sany 486-ǵa jetti. О́telýge jatatyn shyǵyndardyń barlyq túriniń ishinde eksporttaýshylar arasynda taýarlardy temirjol kóligimen jetkizý eń suranysqa ıe ótinim bolyp tur.
Taýarlardy temirjol kóligimen tasý baǵyty boıynsha barlyǵy 7,05 mlrd teńgege 328 ótinim nemese jalpy somanyń 79,7 paıyzy maquldanypty. Taýarlardy jyljytý shyǵyndaryn óteý boıynsha 0,3 mlrd teńgege 49 ótinim maquldanǵan. Saýda jáne ıntegrasııa mınıstrliginiń habarlaýynsha, salalar boıynsha 2022 jyly azyq-túlik óndirýshileri dástúrli belsendilik tanytty. Olardyń basym bóligi – maı, un, nan-toqash, unnan jasalǵan kondıterlik ónimder, makaron ónimderi, aýyz sý men sýsyndar, balyq óńdeýshi kásiporyndar. Aýyl sharýashylyǵy salasynda jumys isteıtin eksporttaýshy kompanııalarǵa jalpy somasy 3,7 mlrd teńgeni quraıtyn 229 ótinim maquldandy.
«2021 jylmen salystyrǵanda ótinimderdiń barlyq túri boıynsha ótemaqy kóleminiń ósýi baıqaldy. Qaǵaz jáne qaǵaz ónimderin óndirýshilerdiń ótinimderi boıynsha tólemder aıtarlyqtaı ósti – 5,5 ese, hımııa ónerkásibi ónimderi – 4,7 ese, balyq ósirý kásiporyndary – 4,5 ese, toqyma buıymdaryn óndirýshiler – 3,8 ese. Maquldanǵan ótinimderdiń eń kóp sany Qostanaı oblysyna, Almaty qalasyna, Almaty, Qaraǵandy, Pavlodar oblystaryna jáne Shymkent qalasyna tıesili. 2022 jyly shyǵyndardyń bir bóligin ótegen shaǵyn jáne orta bıznes kásiporyndary negizinen daıyn ónimdi jaqyn elderge eksporttaıdy. Onyń ishinde qazaqstandyq taýarlardyń 17,8 paıyzy О́zbekstanǵa jóneltiledi, Reseıge eksporttyń 16,1 paıyzy aparylady, odan ári Aýǵanstan, Tájikstan jáne Qyrǵyzstan bar. Osy bestikten basqa otandyq kompanııalar ónimderdi Eýropa elderine, sondaı-aq BAÁ, Kanada, AQSh jáne basqa da kóptegen alys shetelderge eksporttaıdy», delingen vedomstvo habarlamasynda.
2022 jylǵy jeltoqsanda eksporttaýshylarǵa shyǵyndardyń bir bóligin óteý erejesine ózgerister bekitildi. Eksporty boıynsha shyǵystary ótelýge jatatyn taýarlardyń tizbesine 1 146 taýar pozısııasy qaıtaryldy. Onyń ishinde un, et, tuz jáne basqalary bar. Qaıtarý negizinen tómengi shekti pozısııalarǵa áser etti.
«2022 jyly QazTrade kólemi jaǵynan da, somasy jaǵynan da ótemaqy alýǵa ótinimdermen aýqymdy jumys júrgizdi. Bıyl úlken mindetter tur. Eń aldymen, 2022 jylǵy ótinimderdi qaraý prosesin aıaqtaý qajet. Bul 7 mlrd teńgege 300-ge jýyq ótinim. Bul másele boıynsha sheshim qabyldanyp, bıýdjette qajetti qarajat qarastyrylǵan. Ekinshiden, ótinimderdi jańa qabyldaýdy jarııalaý máselesi pysyqtalýda. QazTrade, árıne, bizdiń eksporttaýshylardyń belsendiligine senedi», dedi QazTrade ortalyǵynyń basshysy Nuraly Bókeıhanov.
«QazTrade» eksporttaýshylardy qoldaýdyń memlekettik sharalarynyń operatory retinde Saýda jáne ıntegrasııa mınıstrligimen birlesip shyǵyndardy óteý prosesiniń tıimdiligin ońtaılandyrý jáne arttyrý jónindegi jumysty bıyl da jalǵastyrmaq.
2022 jyly «QazTrade» kompanııasyna 259 eksporttaýshy kompanııadan barlyǵy 621 ótinim kelip túsken.