2022 jyldyń jeltoqsan aıynyń qorytyndysy boıynsha teńge 1 dollar úshin 462,66 teńgege deıin 1,3 paıyzǵa nyǵaıdy. Qazaqstan qor bırjasyndaǵy saýda-sattyqtyń ortasha kúndik kólemi bir aıda 132 mln-nan 141 mln dollarǵa deıin ulǵaıǵan. Saýda-sattyqtyń jalpy kólemi – 2,95 mlrd dollar.
Bir aıda valıýta naryǵy suranys pen usynys turǵysynan teńgerimdi bolyp, aıyrbastaý baǵamy naryq talaptaryna saı qalyptasqan.
Ulttyq bank málimeti boıynsha, kvazımemlekettik sektor sýbektileriniń valıýtalyq túsimdi satýy ótken aıdyń ishinde shamamen 328,7 mln dollardy qurady. Kvazımemlekettik sektor kompanııalary valıýta naryǵynda satýdy ekinshi deńgeıli bankter arqyly óz betinshe júzege asyrady.
«Jeltoqsanda Ulttyq qordan respýblıkalyq bıýdjetke transfertterdi qamtamasyz etý úshin 461 mln dollarǵa valıýta satyldy. Ulttyq qordan satý kólemi saýda-sattyqtyń jalpy kóleminen 16 paıyz boldy nemese bir kúnde 31 mln dollardan aspady. Ulttyq qordyń qarajatymen operasııalar júrgizý kezinde Ulttyq bank naryqtyń beıtarap qaǵıdatyn saqtaıdy. Bul shetel valıýtasyn turaqty ári birkelki satý degendi bildiredi. Bul tájirıbe Ulttyq qor operasııalarynyń valıýta naryǵyna áserin meılinshe azaıtýǵa múmkindik beredi», delingen habarlamada.
Zeınetaqy aktıvteriniń valıýtalyq úlesin qoldaý maqsatynda Ulttyq bank byltyr jeltoqsanda bırjalyq saýda-sattyqta shetel valıýtasyn satyp aldy, onyń jalpy somasy 43,2 mln dollardy nemese naryqtyń jalpy kóleminiń shamamen 1,5 paıyzdy quraǵan.
Byltyrǵy jeltoqsan aıynda Ulttyq bank valıýtalyq ıntervensııalar júrgizgen joq.
«Transparenttilik qaǵıdaty aıasynda Ulttyq bank valıýta naryǵynda júrgiziletin barlyq operasııa týraly tolyq aqparatty úzdiksiz jarııalaıdy. Qysqa merzimdi perspektıvada teńge dınamıkasy geosaıası jaǵdaıdyń ózgerýine, ishki qatysýshylardyń kútýlerine jáne álemdik naryqtardaǵy jaǵdaıǵa baılanysty bolady. Ulttyq bank teńgerimsizdikterdiń jınaqtalýyna jol bermeıtin jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejimin ustanýdy jalǵastyrady», delingen habarlamada.