Bıyl Soltústik Qazaqstan oblysynda qys áli qytymyr minez kórsetken joq. Eń kóp degende 22-24 gradýstyq sýyq qatarynan birneshe kún býǵanymen, artynsha qalypty jaǵdaıǵa tústi. Sońǵy aptada aýanyń temperatýrasy tipti 5-6 gradýsqa joǵarylady.
Alaıda keıbir kúnderi uıytqyǵan jel turyp, boran soqty. Qar az bolǵan soń borandy kúnderdiń zardaby qatty tıgen joq. Biraq arnaıy qyzmetter áıteýir aıtpaı qaldy demesin degen bolýy kerek, uıaly telefondarǵa habarlama jiberip, daýyl soǵatynyn 31 ret eskertti. Aǵashy joq, ashyq dalaly aımaqtarda soqqan sondaı shaǵyn borannyń ózi 44 adamdy jylytý tirekterine jetkizýge májbúr etti. Olar osyndaı alaptarda turyp qalǵan avtokólikterdiń jolaýshylary edi. Barlyǵy 4 ret bolǵan osyndaı jaǵdaıda jolaýshylar arasynda 7 balanyń bolǵanyn da aıta ketý kerek.
Tótenshe jaǵdaılar qyzmeti kez kelgen jaǵdaıǵa daıyn ekenin málimdep otyr. Olardyń sengeni – daıyndyq sapyna turǵyzylǵan 1246 tehnıka. Osy tehnıkanyń kúshimen 136 respýblıkalyq, 120 oblystyq, 990 jergilikti mańyzy bar joldy qardan arshymaq. Sonymen birge ázirge tótenshe jaǵdaıǵa shyǵa qoımaǵan, 14 jedel izdeý toby da daıyndyq sapynda ekeni aıtyldy.
Oblystyq TJD bastyǵynyń orynbasary Murat Qanǵojınov «jyldaǵydaı úskirik aıaz ben qalyń qar soqqan soqyr borandar bolsa, qardy jaryp ótetin 61 tehnıkamyz da daıyn», dep málimdedi. Sonymen birge ol qajet bolsa qoldanylatyn qum, qıyrshyqtas, shlak jáne tuzdy qumy aralas 7674 tonna ınertti materıaldar da ázirlengenin jetkizdi. Mundaı materıaldar kóktaıǵaq bolǵan aımaqtarǵa sebilip, kólikterdiń qaýipsiz ótýine múmkindik beredi.
Qazgıdromet qyzmetiniń boljaýyna qaraǵanda, aldaǵy aılarda da aýa raıy qalypty jaǵdaıda bolmaq. Qańtar aıyndaǵy temperatýra 14-17 gradýs sýyq sheginen aspaıdy. Biraq osy aıda qar qalyptaǵy normadan artyq túsedi dep boljam jasalyp otyr. Jeltoqsanda qar juqa bolǵanǵa ókinip júrgen sharýalar úshin bul jaqsy habar. О́ıtkeni qar kóp bolsa, egistiktiń ylǵaly da mol bolatyny belgili.
Sonymen birge gıdromet aqpan men naýryzdaǵy aýa raıynyń temperatýrasy da qalypty jaǵdaıda bolady degen boljam aıtty. Solaı bolǵany halyqqa da tynysh, óıtkeni shekten tys úskiriktiń eshkimge keregi joq.
Kúre joldardaǵy qaýipsizdik júrgizýshilerdiń ózderine de baılanysty. Keıbir júrgizýshiler saqtyq sharalaryn umytyp ketedi. Qysqy dızel otynynyń ornyna jazǵy janar-jaǵarmaımen alys jolǵa shyǵyp ketetinder de bar. Keıbiri qys pen jazǵy joldardyń aıyrmasyn bilmeı qalady. Máselen, qar áli múlde az bolǵanymen, joldyń kóktaıǵaq bolǵanyna qaramaǵan «Almaty – Ekaterınbýrg» trassasynyń 758-shaqyrymynda kele jatqan MAN júk avtomobıli joldyń shetine shyǵyp ketti. Júk kóliginiń júrgizýshisi qatty jyldamdyqpen kele jatyp tejegishti basqan. Sonyń saldarynan júk kóligi trassadan taıyp ketken. Abyroı bolǵanda júrgizýshisi aman. Dál sondaı jaǵdaıǵa Aıyrtaý aýdanynyń aýmaǵyndaǵy «Rýzaevka – Saýmalkól» baǵytymen kele jatqan KamAZ avtomobıli de ushyrady. Abyroı bolǵanda eshqandaı júgi bolmaǵan kólik TJ qyzmetiniń kómegimen jyldam qutqaryldy. Mine, qystyń kózi qyraýda osyndaı oqıǵalar jıileı beredi. Sondyqtan júrginshilerdiń de qyraǵy bolǵany jón.
Soltústik Qazaqstan oblysy