Birneshe kún buryn quıyndaı soqqan dúleı daýyl saldarynan Jańatas, Qarataý qalalaryndaǵy turǵyn úıler men nysandardyń shatyry ushyp, elektr baǵanalary qulap, jurt jaryq pen jylýsyz qalǵan bolatyn. Jergilikti atqarýshy bıliktiń jedel iske kirisýimen atalǵan qalalardaǵy jaǵdaı retimen qalypqa keldi. Qazir jurt jaryqtan taryǵyp otyrǵan joq, aýyz sý jáne jylýmen qamtyldy.
Jaǵdaı óńir basshysy Nurjan Nurjigitovtiń tolyqtaı baqylaýynda. Áıtkenmen, monoqaladaǵy «Kókbulaq» sýmen qamtý qoımasyndaǵy elektr jelilerin jónge keltirý jumystary jedel aıaqtalýǵa tıis. Sonymen qatar «Jańatas sý jylý» kásipornyn sapaly aýyz sýmen turaqty qamtamasyz etý máselesi de ózekti.
Búginde Jańatastaǵy ortalyq qazandyq shtattyq rejimde jumys istep tur. Qyzmetkerler jurtty jylýmen qamtý úshin jan aıamaı eńbek etýde. Nátıjesinde, qala turǵyndary jylýmen qamtylǵan. Qazirgi kezde qaladaǵy 97 kópqabatty turǵyn úı boıynsha aınalymdy retke keltirý, artyq aýany shyǵarý jumystary júrgizilip jatyr.
Dúleı daýyl saldarynan Jańatas qalasynda uzyn sany 9 nysan aıtarlyqtaı búlingen bolatyn. Atalǵan ǵımarattardyń barlyǵynda kúrdeli jóndeý jumystary bastalyp ketti. О́ńir basshysynyń tapsyrmasyna sáıkes, jumysty sapaly atqarý úshin jergilikti merdigerler jumyldyrylǵan. Olar bastalǵan jumysty jedel aıaqtaýy kerek.
Sarysý aýdandyq elektr jelilerin taratý mekemesi mamandarynyń aıtýynsha, 726 shaqyrym elektr jelileriniń 62 shaqyrymy úzilgen. 10,5 myń elektr baǵanasynyń 240-y qulaǵan. Búginge deıin 51 shaqyrym elektr jelisi men 151 baǵana qalpyna keltirilgen. Aýdandaǵy 25 aýyldyń 23-i elektr energııasymen qamtamasyz etildi. Jańatastaǵy 97 kópqabatty turǵyn úıdiń barlyǵyna elektr energııasy qosylǵan. Qysqasy, jaǵdaıdy qalypqa keltirý maqsatynda aýqymdy jumys atqarylyp jatyr dep aıtýǵa tolyqtaı negiz bar.
«Barlyq qalpyna keltirý jumystary 10 kúnniń ishinde aıaqtalýǵa tıis. 1-2 kúnde Jańatas qalasy jáne aýdannyń eldi mekenderi tolyqtaı elektr energııasymen qamtylýy kerek. Osy merzimde qalaǵa sý, jylý tolyǵymen berilýi qajet. Qaladaǵy ár úıge jylýdyń jetýin tekseremiz. Ishinara búlingen nysandardy aýdan basshylary bir kúnde retke keltirýi kerek. Ár nysanǵa bir-bir merdigerden bekitiledi. Ýaqyt joǵaltýǵa bolmaıdy. Eldi mekenderdi tazartý jumystaryna da barynsha kóńil bólemiz. Bizdiń eń negizgi mindetimiz – halyqqa qyzmet kórsetý», dedi óńir basshysy.
Qatty jelden Talas aýdanynyń ortalyǵy Qarataý halqy da aıtarlyqtaı zardap shekken bolatyn. Munda jalpy sany 11 nysan búlingen. Búginde atalǵan nysandardyń barlyǵyna jóndeý jumystary júrgizilip jatyr. О́ńir basshysy kúrdeli jóndeýdi qajet etpeıtin nysandardy asar ádisi arqyly qalypqa keltirý kerektigin aıtyp otyr.
«Aýa raıy qaıtadan buzylmaı turyp, barlyq jóndeý jumystaryn qysqa merzimde aıaqtaýǵa tıispiz. Erteń suraq týyndamas úshin barlyq jumystyń sapaly oryndalýyn qatań baqylaýda ustaý qajet. Ishinara buzylǵan nysandardy asar ádisimen retke keltirý kerek. Tabıǵı tótenshe jaǵdaı saldaryn joıýǵa turǵyndardy da jumyldyrý mańyzdy. Aýyldastardyń bir-birine qolushyn berýi qanymyzda bar ıgi dástúr. «Jumyla kótergen júk jeńil» dep beker aıtylmaǵan», dedi N.Nurjigitov.
Qysqasy, dúleı jel saldarynan týyndaǵan máselelerdi der kezinde sheshý úshin barlyq jaǵdaı qarastyrylyp jatyr. Jergilikti atqarýshy bılik kún qaıta sýytpaı turyp, jóndeý jumystaryn jedel aıaqtaýǵa yntaly. Sol úshin de barlyq jumysqa jergilikti merdigerler tartylyp otyr.
Jambyl oblysy