Sybaılas jemqorlyqqa qarsy qyzmet T.Ábıevtiń buqaralyq aqparat quraldarynda zııandy málimetterdi taratý jáne óziniń Youtube-arnasynda shyndyqqa sáıkes kelmeıtin beınejazbalardy joıý úshin kásipkerden asa iri mólsherde aqsha bopsalady degen kúdikpen qylmystyq áreketiniń jolyn kesti, dep habarlaıdy Egemen.kz ANTIKOR baspasóz qyzmetine silteme jasap.
2022 jyldyń 14 jeltoqsanynda Ábıev 50 mıllıon teńgemen ustalyp, sottyń sanksııasymen 2 aı merzimge qamaýǵa alyndy.
Sondaı-aq Ábıev memlekettik organdar qyzmetkerleri men azamattardy adastyrý maqsatynda «Sybaılas jemqorlyqqa qarsy kúres Departamenti» JShS jeke zańdy tulǵasyn tirkegeni anyqtaldy. Atalǵan uıymnyń basshysy bolyp kórinip, sol arqyly bılik ókiliniń beınesin jasap, Ábıev kásipkerler men memlekettik organdardyń laýazymdy adamdarynan óziniń jeke múddesi úshin is-áreketter jasaýdy, sondaı-aq zańda belgilengen tártipti buza otyryp aqparat pen materıaldar berýdi talap etken.
Abıev tek ózine-ózi qyzmet etý sebepterin kózdeı otyryp, aqshalaı syıaqylar úshin jeke tulǵalarǵa óz uıymy qyzmetkeriniń qyzmettik kýálikterin berip, olardy bılik ókiliniń mártebesi týraly jańylystyrdy.
«Ábıevtiń qyzmeti quqyq qorǵaý organdarynyń jumysymen eshqandaı baılanysy joq. Ábıevtiń basqa da osyǵan uqsas qylmystarǵa qatysy týraly aqparat tekseriledi. Ábıevtiń zańsyz qyzmetiniń barlyq faktileri týraly Sybaılas jemqorlyqqa qarsy qyzmetke 1424 nómiri boıynsha habarlasýyńyzdy suraımyz», delingen vedomstvo habarlamasynda.