Qazaqstanda Gollıvýd fılmderin dýblıaj jasaýdyń 12 jyldyq tarıhynda qazaq tiline aýdarylǵan «Avatar: sý joly» fılmi alǵash ret kassalyq tabys boıynsha absolıýttik rekord ornatty. Bul jańalyqty Disney stýdııasynyń TMD jáne Qazaqstandaǵy resmı dıstrıbıýtory – Meloman kompanııasy habarlady.
Djeıms Kemeronnyń qazaq tiline aýdarylǵan fılmi 69 mıllıon teńgeden asa rekord somany jınady. Qazaq tilindegi seanstardy barlyǵy 42 myńnan asa kórermen tamashalady.
– «Avatar: sý joly» – 2022 jyly qazaq tiline aýdarylǵan Dısneıdiń úshinshi fılmi. Dýblıajdy shyǵarmalary saýatty ádebı stılmen erekshelenetin Aray Media Group stýdııasy jasady. Fılmder – tildi tanymal etýdiń tamasha tásili. Fılmder sózdik qordy baıytýǵa, sondaı-aq túrli sóz tirkes pen órnekti qoldanýdyń mánmátinin túsinýge múmkindik beredi. Bul fılmdi ekinshi ret bilim berý maqsatynda kórýge bolady, – deıdi kompanııa ókilderi.
Meloman-nyń resmı málimetinshe, fılmniń TMD elderindegi jalpy kassalyq alymdary 7,3 mıllıon dollardan (3,4 mıllıard teńgeden astam) asty, bul «Avatar: sý joly» prokatynyń bastalýyn TMD tarıhyndaǵy eń sátti etti. Tek Qazaqstandaǵy kórermen sany bir mıllıonnan asty. Fılm kassasy 4,1 mıllıon dollardan asatyn Marvel-diń «О́rmekshi adam: úıge qaıtar jol joq» jáne 3,9 mıllıon dollardan asatyn «Doktor Strenj» fılmderin artta qaldyrdy.
«Kemeronnyń týyndysy elimizdiń prokat tarıhyndaǵy eń kassalyq kórkem jáne anımasııalyq fılmder tiziminde birinshi orynda tur. Kórermender men baspasóz ókilderi fılmdi Gollıvýdtyń eń mańyzdy kartınalarynyń biri dep atady. Bul, shyn máninde, búkil sala úshin tarıhı jáne mádenı kezeń. Onyń mańyzyn tolyq baǵalaý úshin egjeı-tegjeıli taldap, birneshe sholý jasaý kerek», dedi kompanııa ókilderi.