Byltyr Astanadaǵy áýejaıda Fast Track qyzmetin 18,5 myń jolaýshy paıdalanǵan. Fast Track qyzmeti elordalyq áýe aılaǵynda tirkeýden jáne tekserýden jedel ótýge múmkindik beredi.
2022 jyldyń mamyrynda Astanadaǵy áýejaıda Fast track qyzmeti iske qosylǵan bolatyn. Atalǵan qyzmet túri tek qol júgi bar jolaýshylarǵa avıareısterge jedel tirkelý jáne tekserý pýnktterinen kezeksiz ótýdi usynady.
Jyldam tirkeýden ótý jáne tekserý jelisin bıznes-klaspen jıi ushatyn jolaýshylar men kishkentaı balalary bar otbasylar jıi paıdalanady. Sonymen qatar bul qyzmet túri múmkindigi shekteýli jáne aýtızm spektri buzylǵan jolaýshylarǵa óte qajet. Atalǵan sanattaǵy azamattar úshin Fast track qyzmeti tegin ekenin eske sala keteıik. Sondaı-aq balalar úshin aıtarlyqtaı jeńildik qarastyrylǵan.
Elorda áýejaıynyń atalǵan qyzmet túrin arnaıy sanattaǵy 17 763 jolaýshy, taǵy 756 adam kommersııalyq negizde paıdalanǵan. Qazirgi ýaqytta Fast track qyzmeti Astana áýejaıynda Air Astana, Qazaq Air, Fly Arystan, Scat jáne «Iýjnoe nebo» avıakompanııalary júzege asyratyn ishki reısterde engizilgen. Qyzmet túrin paıdalanýǵa nıetti jolaýshylarǵa kómektesý úshin áýejaıda dybystyq eskertý qarastyrylǵan, sondaı-aq Fast track pýnktine jol kórsetetin arnaıy belgiler ornalastyrylǵan.
Aıta keterligi, áýe jolaýshylarynyń jaılylyǵy men qaýipsizdigi úshin Astanadaǵy áýejaı Qazaqstanda birinshi bolyp aýtızmi jáne aqyl-oı kemistigi bar jolaýshylarǵa qyzmet kórsetý boıynsha ozyq tájirıbeni engizgen. Shekteýleri bar jolaýshylarǵa qyzmet basym tártippen kórsetiledi. Olar úshin áýejaıda tıisti lanıardtar da qarastyrylǵan. Arnaıy taspalar áýejaı qyzmetkerlerine múgedektigi bir qaraǵanda baıqalmaıtyn jolaýshylardy alyp júrý jáne rásimderden ótkizý barysynda basymdyq berý úshin tanyp-bilýge múmkindik beredi.
– Biz Qazaqstannyń avıasııalyq ákimshiligimen, Azamattyq avıasııa komıtetimen jáne Autism Kazakhstan ulttyq qaýymdastyǵymen birlesip, joba jasadyq. Áýejaıǵa kelgen kezde aýtızmmen aýyratyn jolaýshyny alyp júretin adam anyqtamalyq keńsege nemese qabyldaý bólmesiniń janyndaǵy agentterge kúnbaǵys beınelengen arnaıy lanıard alý úshin júgine alady. Bul tehnologııa týraly barlyq avıakompanııa ókilderi biledi, – deıdi Jolaýshylar tasymaly bólimshesiniń aǵa agenti Rýslan Masǵutov.
Tirkeý jáne tekserý úrdisi ádette jolaýshylardyń 20 mınýt nemese odan da kóp ýaqytyn alady. О́z kezeginde atalǵan qyzmet túri standartty tirkeý jáne tekserý prosedýralaryn 3-5 mınýttyń ishinde ótýge múmkindik beredi. Astana áýejaıy ókilderiniń aıtýynsha, 10 mınýttyń ishinde qyzmetti 15 jolaýshy paıdalana alady eken. Sonda orta eseppen ár jolaýshyǵa 40 sekýnd jumsalady.