Syrqatyna daýa izdegen jannyń bári dárigerden kómek kútetini daýsyz. Atyraý oblystyq kardıologııa ortalyǵynda sondaı syrqattyń birine jasalǵan kúrdeli operasııa sátti ótti.
Ortalyq dárigerleri bul naýqasta anevrızmanyń jarylý, aǵzalarda ıshemııa men ishperde qýysynda nekroz qaýpi týyndaǵanyn anyqtady. Sol sebepten, Atyraýǵa Ulttyq ǵylymı onkologııa ortalyǵy dárigerleriniń arnaıy brıgadasy keldi. Onyń quramynda bilikti dárigerler, professor Toqan Sultanálıev pen medısına ǵylymdarynyń kandıdaty Serik Súleımenov bar. Elordalyq dárigerler toby jergilikti kardıologııa ortalyǵynyń mamandarymen birge vısseraldyq arterııalardy rekonstrýksııalap, anevrızmany kesý operasııasyn júrgizdi.
– Operasııa kezinde torakofrenolýmbotomııa jasaldy. Sodan keıin ishperde qýysynyń aortasy men vısseraldyq tamyrlardyń anevrızmalary oqshaýlandy. Qysqyshtardy salǵannan keıin anevrızma alynyp tastaldy. Aortada proksımaldyq anastomoz paıda boldy. Budan soń joǵary shajyrqaı men baýyr arterııalary kúıdirilip, tigildi. Operasııadan keıin birden ekstýbasııa jasaldy, – deıdi operasııa jasaǵan dárigerler.
Olardyń aıtýyna qaraǵanda, syrqatta operasııadan keıingi kezeń birqalypty ótken. Naýqas jetinshi kúni úıine shyǵaryldy. Endi odan ári qalpyna kelý prosesi júrip jatyr. Mundaı kúrdeli operasııanyń jergilikti dárigerler úshin mańyzy zor. Birinshiden, biliktilik arttyratyn sheberlik saǵatyndaı bolǵany jasyryn emes. Ekinshiden, ortalyq dárigerleri osyndaı operasııany ózderi ótkizetindeı tájirıbe jınady.
Atyraý oblysy