Májilis depýtaty Qaınar Abasov «Amanat» partııasy Túrkistan oblystyq fılıalynda jıyn ótkizip, óńirdiń agrarlyq salasy boıynsha ózekti máselelerdi talqylady. Otyrysty partııanyń aımaqtyq fılıalynyń tóraǵasy Altynsary Úmbetálıev ashyp, júrgizip otyrdy.
Kezdesýge salaǵa jaýapty óńirlik basqarmalar men departament basshylary, aýdan jáne qala ákimderiniń orynbasarlary, jergilikti sharýalar, sondaı-aq BAQ ókilderi qatysty. Aldymen oblystyq aýyl sharýashylyǵy basqarmasy basshysynyń ýaqytsha mindetin atqarýshy N.Myrzahmetovtiń 2022 jyly atqarylǵan jumystary týraly esebi tyńdaldy.
Baıandamashynyń aıtýynsha, aýyl sharýashylyǵy salasynda aıtarlyqtaı ósim bar. Onyń ishinde egin jáne mal sharýashylyǵy, et eksporty boıynsha Túrkistan óńiri jetekshi orynda. 2022 jyldyń 11 aıynda aýyl sharýashylyǵynda jalpy ónim kólemi 996,3 mlrd teńgeni qurap, 101,2 paıyzǵa artty. Respýblıkadaǵy úlesi 11,4 paıyz, ıaǵnı 3 orynda tur. Aýyl sharýashylyǵy daqyldary 859,9 myń gektarǵa egilip, egis kólemi ótken jylmen salystyrǵanda 14,4 myń gektarǵa ulǵaıǵan.
Sondaı-aq N.Myrzahmetov sheshimin kútken máselelerge de toqtaldy. Túrkistan oblysy Respýblıka boıynsha maqta ósiretin jalǵyz aımaq. Ony ári qaraı damytý úshin ınvestısııalyq sýbsıdııalaý baǵdarlamasyna «Shıtti maqtany óńdeý, tereń qaıta óńdeý kásiporyndaryn qurý jáne keńeıtý» pasportyn engizý, salymdardy óteý úlesin 50 paıyz sýbsıdııalaýdy qarastyrý, tozyǵy jetken qural-jabdyqtardy jańartý qajet. Salanyń ózge de baǵyttarynda sharýalardy qoldaý boıynsha sharalar jáne tarıfterdi tómendetýdi usyndy.
Budan keıin sóz alǵan sharýalar da saladaǵy kemshilikterdi atap, kún panelderi men uńǵymaǵa sýbsıdııa berý, aǵyn sý tapshylyǵyn sheshý, jaıylym, ónimderdi eksporttaýǵa qoldaý kórsetý jóninde usynystaryn bildirdi. Jıynda oblystyq jer qatynastary basqarmasynyń basshysy E.Tilegen ortaq jaıylymmen qamtamasyz etý barysy týraly baıandap, saýaldarǵa jaýap berdi. Depýtat Q.Abasov sharýalar men jergilikti atqarýshy bılik ókilderin tyńdaı kele kóterilgen máselelerdi daý-damaısyz birlesip sheshýge úndedi.
«Búgin ózekti máselelerdi talqyladyq. Olardy sheshý úshin eń áýeli qarjylandyrý, munan soń jeńil jáne tamaq ónerkásibin damytýdy kúsheıtý, qajetti tehnıkamen qamtamasyz etý, jerdi tıimdi paıdalaný júıesin jetildirý kerek. Azyq-túlik ónimderiniń baǵasyn dúkenniń sóresinde retteý múmkin emes. Onyń sheshimi – óndiris oryndaryn kóbeıtý. Problemalardy mınıstrlikter men tıisti quziretti organdar aldynda kóterip kelemin. Sizderdiń usynystaryńyz naqty bolǵany jón. Bul depýtattyq saýalnamany joldaýda saraptaý jáne bıýdjetti josparlaý barysynda óz tıimdiligin kórsetedi. Qajettilik týyndasa jaýapty mınıstrmen óńirge arnaıy kelip, betpe-bet júzdestirýge daıynmyn. Barlyq problema «Amanat» partııasynyń Jol kartasyna engizilse, eń aldymen Memleket basshysy, keıin Úkimet pen depýtattardyń ıaǵnı, úsh jaqty qadaǵalaýda bolady. Zań shyǵaratyn depýtat bolsa, al depýtatqa jol silteıtin – halyq», dedi Q.Abasov.
Sondaı-aq jıyn barysynda «Aýyl amanaty» partııalyq jobasy men «Jer amanaty» komıssııasyna da qatysty jaılar talqylanyp, kún tártibindegi másele boıynsha usynystar hattamaǵa engizildi. Is-shara sońynda qatysýshylar qoıan-qoltyq jumys atqarýǵa ýaǵdalasty.