Qala turǵyndary men qonaqtaryna arnalǵan kitapta Abaı oblysyndaǵy tarıhı jerler, fotosýret, derekter men eskertkishter týraly málimetter jınaqtalǵan. «Kıeli Abaı eli» kitap-albomy 1000 dannamen qazaq, orys, aǵylshyn tilderinde jaryqqa shyqty, dep habarlaıdy Egemen.kz.
«Semeı ótken ǵasyrdyń basynda qazaq rýhanııatynyń astanasy sanaldy. Abaıdan bastaý alyp, Alash qaıratkerlerimen jalǵasqan uly jol halqymyzdy jańa deńgeıge kóterdi. 2020 jyly Memleket basshysy Qasym-Jomart Toqaevtyń sheshimimen Semeıdiń elimizdiń tarıhı ortalyǵy mártebesin alýy kezdeısoq qubylys emes edi. 2022 jyly jańa, derbes aımaq - Abaı oblysynyń qurylýy ádildik kóshiniń jalǵasyna aınaldy. Bul jer - tarıhtyń qaınar kózi. Sáýlet pen memorıaldyq qurylys, tarıh pen ǵylym, mádenıet pen bilim berý, ınjenerlik tehnologııalar men ózge sala nysandary mańyzdy oqıǵalardyń kýásindeı, búginge deıin ótken kúnnen syr shertedi. Tarıhty bilip, túsinýde - keleshek damýymyzdy aıqyndaıtyn dańǵyl jol bar», dep jazylǵan oblys ákimi Nurlan Uranhaevtyń alǵysózinde.
Belgili jýrnalıst Alla Belıakına bul kitap Abaı oblysyndaǵy birinshi shyǵarylǵan kitap jáne muqabasyndaǵy tús jańadan qurylǵan óńirdiń jańashyldyǵyn, alǵa umtylysyn bildiredi degen pikirimen bólisti.
Kitaptyń birinshi bóliginde «Abaı jolyna» arnalyp uly tulǵanyń ómirinen derekter keltirilip, shyǵarmashylyǵy baıandalady. Muhtar Áýezovtyń roman-epopeıasynyń negizinde geografııalyq jáne sakraldy jerler týraly bilýge bolady. Bul bólimde Abaı Qunanbaıulynyń esimimen baılanysty eskertkishtermen jáne murajaılarmen tanysýǵa bolady.
Ekinshi bólimde oblystyń ákimshilik ortalyǵy Semeı qalasy týraly baıandalady. Tarıhı muraǵa baı qalada eń birinshi telegraf, sý júıeleri, telefon, kınematografııa ǵımaraty ashylyp, órkenıettiń jetistikteri halyq ıgiligine berilgen.
Úshinshi bólimde Abaı oblysynyń qonaqjaılyǵy, halyq jıi baratyn kıeli jerler týraly aıtylady. Búginde elimizdiń maqtanyshy el turǵyndary men týrıster kóp keletin Alakól, kıeli ólke «Qońyr áýlıe» úńgiri, sýy shıpaly Shoshqaly kóli týraly jan-jaqty qyzyqty aqparattar jarııalanǵan.
«Kitapty baspaǵa daıyndaý barysynda ózindik qıyndyqtar boldy. Sebebi búkil oblysty aıtpaǵanda qalanyń ózinde qyzyqty, tarıhı qundy derekter kóp. Olardy tańdaý bizge óte qıyn boldy. Jalpy oblysymyzdaǵy aýdandar da tarıhı qundy derekterge baı», deıdi Alla Belıakına.
Jańa kitap-albomdaǵy fotosýretter oqyrmanǵa óńir tarıhy týraly keńinen maǵlumat beredi.