Syn sátte óz ómirin qaterge tigip kózsiz erlikke barý – kez kelgenniń kókeıine kele bermeıtin batyldyq. Keleńsiz oqıǵa bolǵan jerge kezdeısoq kelip, múlde tanymaıtyn adamdy lapyldap jatqan qyzyl jalynnyń ishinen aman alyp shyqqan Baýyrjan Áýelbekovti búgingi zamannyń batyry desek artyq bolmas.
Almatynyń «Darhan» shaǵyn aýdanynda azamattyq nekedegi áıelin dúkenmen birge órtep jibermek bolǵan er adam oqıǵa ornynda kóz jumdy. Áıeldi ajaldan arashalap qalǵan taksı júrgizýshisi Baýyrjan Áýelbekov sol mańnan ótip bara jatyp dúkenge kirgen.
«Dúkende turǵanymda bir adam kirip kelip dereý syrtqa shyǵýymdy talap etti. Basynda túk túsinbeı abdyrap qaldym. Qaltasynan tapansha shyǵaryp maǵan kezedi, sasqanymnan dalaǵa atyp shyqtym. Men shyǵa sala dúken esigi ishinen bekitilip, aıǵaılaǵan daýystar estildi. Ne isterimdi bilmeı dúken janyndaǵy dárihanashyǵa bardym. Polısııa shaqyrdyq», deıdi Baýyrjan Áýelbekov.
Qolyna benzın toltyrylǵan kanıstr ala kirgen er adam suıyqtyqty dúken ishine shashyp órt qoıǵan. Saldarynan qatty jarylys bolyp terezedegi temir qorshaýlar kósheniń qarsy betine deıin ushqan. Kýágerlerdiń aıtýynsha jarylys kezindegi qysymnan dúkenniń temir esigi de julynyp ketken. Osy kezde Baýyrjan Áýelbekov lapyldaǵan ottyń ishine kirip adamdardy qutqarýǵa áreket jasaǵan.
«Oılanyp turatyn ýaqyt joq, júgirip ishke kirdim. Ap degende shatyrlaǵan jalynnyń qyzýynan qas-kirpigim men shashym, betim kúıip qaldy. Túk kórinbeıdi. Dúkenshi áıeldiń shyńǵyrǵan daýsyn estip, kóterip aldym da syrtqa qaraı júgirdim. О́rtenip ketken kıimderine qolym jabysyp qalǵanyn sezdim. Joldyń arǵy betindegi №25 emhanaǵa deıin kóterip apardym, beıshara qatty kúıgen. Dárigerlerdiń qolyna tapsyryp, kóńilim ornyna tústi. О́zimniń de ońbaı kúıip qalǵanymdy sol kezde bir-aq sezdim», deıdi ol.
Aýyr jaraqat alǵan kelinshek jansaqtaý bólimine túsken, qazir jaǵdaıy ońalyp keledi. Al er adam ózi qoıǵan órttiń saldarynan tirideı janyp ketken. Birer kún buryn jábirlenýshiniń baýyry atalǵan jaıdyń sebebin jelige jarııalap, kómek surady. Onyń aıtýynsha, ápkesi men reseılik azamat Bobrıev birneshe jyl buryn birge turǵan. Alaıda 2019 jyldan beri janjaldasyp keledi. Sol kezde de ol áıeldi uryp-soǵyp, qolyn syndyrǵan. Ony eldiń aýmaǵynan alastatý boıynsha sottyń sheshimi shyqqanymen, Qazaqstannnan ketpegen.
«41 jastaǵy ápkem jalǵyzbasty, bir qyzy bar. Qarasha aıynda ákemniń atynan nesıe alyp azyq-túlik dúkenin jalǵa aldy. Qaıǵyly jaǵdaıdan bir kún buryn Bobrıev onyń turaqta turǵan kóligin kórip, dúkenge kelip, qoqan-loqy kórsetken. Buǵan deıin ol ápkemniń qyzyn mektepke kelip qorqytatyn. Osyǵan baılanysty Alataý aýdanynyń IIB-niń ýchaskelik polısııasyna aryz jazdym. Biraq eshkim Bobrıevti izdegen joq. Al 21.12.22 jyly saǵat 16.30-da Bobrıev dúkenge eki kanıstr benzınmen, tapanshamen, ottyqpen keldi. Myltyqpen dúkendegi satyp alýshyny qýyp jiberdi. Dúken ishi men ápkeme janarmaı shashyp, órt qoıǵan. Saldarynan jarylys tolqyny terezeler men esikterdi jaryp jiberdi. Dese de Bobrıev qýyp jibergen turǵyn qaıta dúkenge kirip, órttiń ishinen ápkemdi alyp shyqty. Oǵan sheksiz alǵys bildiremiz. Eger ýchaskelik polısııa kómek suraǵan kúni shara qoldansa, mundaı qaıǵyly jaǵdaı bolmas edi. Ol bir jyl buryn jer aýdarylǵan bolsa, ápkem zardap shekpes edi jáne qazir mundaı azapty kórmes edi! Polısııa sottyń sheshimin oryndamaǵan», deıdi jábirlenýshiniń baýyry Gúlmıra.
Oqıǵa saldarynan dúkenge jaqyn ornalasqan dárihana da órtke oranǵan. Polısııa qaıǵyly oqıǵaǵa baılanysty qylmystyq is qozǵalǵanyn jetkizdi.
«Kisi óltirýge oqtalý deregi boıynsha qylmystyq is qozǵaldy. Oqıǵa ornynan tabylǵan qarýdyń kimge tıesili ekeni anyqtalyp jatyr. Sondaı-aq qyzmettik tekserý júrgizilýde. Tergeý barysy IIM men Almaty qalasy polısııa departamenti basshylyǵynyń baqylaýynda», dep málimdedi Almaty qalalyq polısııa basqarmasynyń baspasóz qyzmeti.
Jábirlenýshiniń týystary jaqynynyń janyn aman alyp qalǵan azamatqa alǵysyn aıtýda. Oqıǵa kýágerleri qaısar jigitke jergilikti bılik tarapynan laıyqty qurmet kórsetilse deıdi. Tórt balasymen bir bólmeni jaldap turatyn Baýyrjan Áýelbekov órt kezinde qoldary kúıip, dene jaraqatyn alǵandyqtan jumysqa shyǵa almaı qalǵan. Janqııarlyq pen batyldyqty tek qyzmet babynda ǵana emes, kez kelgen ómirlik jaǵdaıda tanytýǵa bolatynyn pash etken onyń azamattyǵy kópke úlgi.
ALMATY