Qostanaıda 11-den 16 jasqa deıingi mektep oqýshylarynyń «Shans Winter Cup» respýblıkalyq týrnıri márege jetti. Úsh sport ǵımaratynda úsh kún boıy ótken uzynturalardyń dop dodasyna Astana, Almaty, Aqtóbe, Qostanaı qalalaryndaǵy 5 jekemenshik mektepten 17 komanda qatysty.
Oblystyq sport basqarmasy mamandarynyń aıtýynsha, týrnırdiń qalalyq kezeńi bastalǵan úsh aıdyń ishinde shákirtterdiń sheberlik deńgeıiniń edáýir óskeni baıqalady, komandalardyń oıyn órnegi de aıshyqtala túsken. Bul oraıda mamandar dene shynyqtyrý muǵalimderiniń eńbegi orasan zor deıdi.
Týrnır barysynda balalardyń oıyn tehnıkasyn jaqsy meńgergeni aıqyn ańǵarylyp turdy. Shalt qımyldap, shapshań shabýyldap, taktıkalyq oıynnyń ozyq úlgisin kórsete bilgen komandalar da barshylyq. Komandalar úsh kúnniń ishinde 50 oıyn ótkizdi.
Nátıjesinde, 2007-2008 jyly týǵan jasóspirim oqýshylar arasynda birinshi oryndy «Aqtobe Junior» komandasy, ekinshi oryndy «Sparta», úshinshi oryndy «Vista» komandasy jeńip aldy. Sondaı-aq 2009-2010 jyly týǵan balalardyń jarysynda nátıjeli oıyn órnegin kórsete bilgen «ADK», «Vista» jáne «Legıon» komandalary aldyńǵy úshtikten kórine bildi.
10-11 jastaǵy balǵyndar arasynda ótken oıyndarda astanalyq «Vista» komandasy jeńimpaz atandy. Al Ishan Samaev, Georgıı Reznıkov, Georgıı Marchenko, Aleksandr Ionov syndy balaqaılar týrnırdiń eń úzdik oıynshysy degen marapatqa ıe boldy.
QOSTANAI