Qazaqstannyń Tuńǵysh Prezıdenti - Elbasynyń mártebesi men ókilettigin retteıtin konstıtýsııalyq normalar resmı túrde kúshin joıdy. Bul týraly búgin, 11 qańtarda «Egemen Qazaqstan» gazetinde jarııalanǵan Konstıtýsııalyq Sot qaýlysynda kórsetildi, dep habarlaıdy Egemen.kz.
Málim bolǵandaı, 2023 jylǵy 5 qańtarda Parlamenttiń bir top depýtatynyń atynan Konstıtýsııalyq sotqa Ata Zańnyń 62-babynyń 4-tarmaǵyna resmı túsindirme berý týraly ótinish kelip túsken.
Depýtattar onda «Tuńǵysh Prezıdenttiń mártebesi men ókilettigin retteıtin normalardy alyp tastaýǵa baılanysty «Qazaqstan Respýblıkasynyń Tuńǵysh Prezıdenti – Elbasy týraly» Konstıtýsııalyq zańnyń kúshi joıyldy dep tanylýǵa jata ma?» degen saýal joldaǵan.
Osyǵan oraı Konstıtýsııalyq Sot 2022 jylǵy 5 maýsymdaǵy respýblıkalyq referendýmnan keıin osy Konstıtýsııalyq zańnyń qoldanystaǵy zańnamada saqtalýy Qazaqstan Respýblıkasy Konstıtýsııasynyń jańalanǵan redaksııasymen kelispeıdi dep paıymdaıdy.
Osylaı deı kele Konstıtýsııalyq Sot: «2022 jylǵy 5 maýsymdaǵy respýblıkalyq referendýmda bildirilgen, Qazaqstan Respýblıkasynyń Konstıtýsııasynan 46-baptyń 4-tarmaǵy men ózge de normalardy alyp tastaý týraly Qazaqstan halqynyń erkine negizdele otyryp, qazirgi ýaqytta Qazaqstan Respýblıkasynyń Konstıtýsııasynda «Qazaqstan Respýblıkasynyń Tuńǵysh Prezıdenti - Elbasy týraly» Qazaqstan Respýblıkasy Konstıtýsııalyq zańynyń Qazaqstan Respýblıkasynda qoldanylatyn quqyqta saqtalýyna quqyqtyq negizder joq, dep taný qajet, osyǵan baılanysty onyń kúshi joıyldy dep tanylýǵa jatady» dep qaýly qabyldady.
Eske sala keteıik, 2022 jylǵy 5 maýsymda ótken referendým nátıjesinde Respýblıkanyń Tuńǵysh Prezıdenti – Elbasy Nursultan Nazarbaevtyń mártebesi men ókilettigi, olardy konstıtýsııalyq zańmen reglamentteý múmkindigi, Konstıtýsııalyq Keńeske ǵumyr boıy músheligi, sondaı-aq onyń arnaýly artyqshylyqtary – mártebesiniń ózgermeýi, qatarynan eki retten artyq Prezıdent bolyp saılanýǵa shekteýdiń qoldanylmaýy Konstıtýsııadan alynyp tastaldy.