Taldyqorǵanda qurbysyn urdy dep aıyptalǵan mektep oqýshylarynyń ata-analary sotqa tartyldy. Jetisý oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń sheshimimen árbir otbasyna 20 AEK aıyppul salyndy, bul 69 myń teńgeni qurady, dep habarlaıdy Egemen.kz.
Rolisia.kz taratqan málimetke sáıkes, quqyq buzýshy qyzdarǵa qatysty ÁQBtK-niń 73-1-baby boıynsha ákimshilik is júrgizý áli de jalǵasyp jatyr. Jábirlenýshi oqýshy qyzdyń ókili (onyń ájesi) bastapqyda aryz berýden bas tartqan. Alaıda keshe qalalyq polısııaǵa aryzdandy.
Qyz emdelý jáne tolyq medısınalyq tekserýden ótý úshin aýrýhanaǵa jatqyzyldy. Is júzinde qajetti saraptamalar taǵaıyndaldy. Polısııa janjalǵa qatysýshylarǵa qatysty basqa da faktilerdi tekserip jatyr.
Beınejazbanyń avtory kámeletke tolmaǵan qyzdardyń 19 jastaǵy tanysy bolyp shyqty. Ol da anyqtalyp, polısııaǵa jetkizilip, ákimshilik jaýapkershilikke tartyldy. Kámeletke tolmaǵan quqyq buzýshy qyzdardyń áreketterin bilim berý organdary men quqyq qorǵaý organdarynyń qyzmetkerlerinen turatyn arnaıy qurylǵan komıssııa qarastyrady.
Sonymen qatar áleýmettik jelilerde osy taqyrypqa qatysty balaǵat sózdermen beıne-úndeý jarııalaǵan taǵy bir kámeletke tolmaǵan qyzdyń ata-anasyna aıyppul salyndy. Sondaı-aq qyzdyń ózine qatysty ÁQBtK-niń 434-baby boıynsha materıal jınaldy.