Astyqty óńirde un ónimderiniń birshama qymbattap ketkeni ári tapshy bola bastaǵany týraly ótken jyldyń sońynda el gazeti «Egemen»-de másele kóterip jazǵan bolatynbyz. Jańa jyldan keıin oblys ortalyǵynda sonaý 1952 jyldan beri jumys istep turǵan «Kókshetaý nan zaýyty» kásiporny óz jumysyn toqtatty.
Jańa jyl merekesinde bútin bir qalada ishinara nan tapshylyǵy sezile bastady. О́ıtkeni atalǵan kásiporyn qala halqynyń nanǵa degen qajettiliginiń 10 paıyzyn ótep turǵan eken. Qazir tutynýshylardyń alańdaýshylyǵy basym. Aıdyń-kúnniń amanynda as atasyna jarymaý ne degen sumdyq deıdi olar. Zaýyt nan ǵana emes, nan-toqash ónimderin de shyǵaratyn.
– Birneshe dúkenge kirip nan taba almadym, – deıdi qala turǵyny Erken Sábıtov, – shynyn aıtqanda, nan zaýytynyń ónimi jaqsy edi. Adal dám týraly ǵaıbat aıtýǵa bolmas, degenmen, kóptegen naýbaıhananyń pisiretin nany kóńilden shyǵa bermeıdi. Keıbiri saǵyzdaı sozylyp jatqan dámsiz, úlbirep, úgilip jatyr. Jumystan shyǵa nan satatyn dúkenge júgiretin boldyq. Keshtetip barsań, nan bolmaı qalady. Al kúndiz alýǵa jumystan shyǵa almaısyń. Kóp alsań búlinip ketedi, az alsań kelesi kúnge jetpeı qalady.
Máseleniń mán-jaıyn bilmek bolyp Aqmola oblystyq kásipkerlik jáne týrızm basqarmasy basshysynyń orynbasary Aleksandr Zagrebınmen sóılestik. Basqarma basshysynyń orynbasary bolǵan jaıdan habardar eken. Biraq kásiporynnyń jabylýy týraly anyq bilmeıdi. Másele nege qatysty, un qymbattady ma, joq álde áldebir tetigi isten shyqty ma, ol jaǵy beımálim. Zaýyt dırektory Ánýarbek Omarov shetelde júr eken. Aıtatyn ýáji – endigi arada nan pisirip satý múlde tıimsiz.
Taǵy bir ókinishtisi, osy zaýyttyń jabylýyna baılanysty ondaǵan jumysshy qystyń kózi qyraýda jumyssyz qaldy. Olardyń deni zeınet jasyna taıap qalǵan mamandar. Egde adamdar túgili tepse temir úzetin jastardyń ózi eki qolǵa bir kúrek taba almaı otyrǵanda, endigi arada jumys tabyla ma, joq pa, bul jaǵy da belgisiz.
– Kásiporyn quryltaıshylardyń sheshimimen bıylǵy 1 qańtardan bastap jabyldy. Jumyssyz qalǵan mamandardyń sany – 59. Olar qysqartylatyny týraly eskertýdi 1 jeltoqsannan bastap alǵan. Zańǵa sáıkes jumysshylarǵa barlyq tólemder tólendi. О́kinishke qaraı, zaýyttyń quryltaıshylaryn bilmeımiz. Tek dırektoryn ǵana bilemiz, – deıdi oblystyq kásipkerlik jáne týrızm basqarmasynyń basshysy Erbol Ospanov.
Basqarma basshysynyń aıtýyna qaraǵanda, jekemenshik zaýyt qojaıyndaryna memleket tarapynan kórsetiletin qoldaý usynylǵan eken. Tipti tıimdiligin jaqsartý maqsatynda «Kókshe» áleýmettik-kásipkerlik korporasııasy arqyly jeńildik shartymen nesıe de usynylǵan. Aldaǵy ýaqytta bul usynystar zaýyt qojaıyndary tarapynan qabyldana ma, joq pa, belgisiz. Qalaı bolǵan kúnde de kókshetaýlyqtardyń sapaly nannan sybaǵasy kemigendigi anyq.
KО́KShETAÝ