Qańtardyń qarly borany men qaqaǵan aıazy qalaǵa da, aýylǵa da ońaı tıip jatqan joq. Aýa raıynyń qolaısyzdyǵynan sońǵy aptada mektep oqýshylary onlaın rejimde oqýǵa kóshti. Aýyl-aýylǵa kireberis joldardy qar basyp, jol qatynasy qıyndap ketti. Ol az bolǵandaı, qyryq gradýstyq aıazda iri eldi mekenderdegi jylý, sý qubyrlary da syr bere bastady.
Qutqarýshylarda tynym joq
Úskirik aıazǵa qaramastan saparlap shyǵyp, orta jolda qalǵan jolaýshylar da az emes. Qutqarýshylar sońǵy kúnderi avtokóligi isten shyǵyp, saqyldaǵan sary aıazda aıdalada qalǵan 12 adamdy kúre joldyń boıynda ornalasqan arnaıy jylyjaılarǵa jetkizip, jandaryn aman alyp qaldy. Mysaly, 9 qańtarda áýlıekóldik qutqarýshylar Sulýkól aýylynan 40 shaqyrym qashyqta jolda qalǵan 5 adamdy aman-esen Áýlıekóldegi arnaıy jylyjaıǵa jetkizip, as-sý berip, dárigerlik kómek kórsetti. Olar mingen «Jıgýlı» avtokóligi isten shyqqan. Abyroı bolǵanda, jolaýshylardyń bári din aman, aıaq-qolyn úsik shalyp, aýrýhanaǵa túsken eshkim joq.
– Sol kúni Qamysty aýdanyndaǵy TJ bóliminiń qyzmetkerleri taǵy bir qutqarý sharasyn ótkizdi. Qamysty men Qarabutaqty jalǵap jatqan respýblıkalyq mańyzǵa ıe avtojoldyń 36-shy shaqyrymynda «Mersedes» avtokóligi synyp, jolda qalǵany týraly habar aldyq. Qutqarýshylar dereý jolǵa shyǵyp, jolaýshylardyń kóligin jóndeýge qolushyn berdi. Saǵat 23:00-de 7 adamdy Lıvanov aýylyndaǵy jyly pýnktke ornalastyryp, tamaqtandyrdyq. Jolda qalǵandardyń ishinde 5 bala bar, – deıdi oblystyq TJD baspasóz hatshysy Ýálıhan Dosanov.
Sol kúni 7 jolaýshyny jyly panajaıǵa ornalastyryp bola sala, qutqarýshylardyń qaıta jolǵa shyǵýyna týra kelgen. Bul joly Qostanaı – Qarabutaq baǵytyndaǵy avtomobıl jolynyń boıynda qar qursaýynda qalǵan júk kóliginen qońyraý túsken. Júk kóligin mingen 2 jolaýshy da Lıvanov aýylyna jetkiziledi.
Tótenshe jaǵdaı departamentiniń málimetinshe, borandy-aıazdy kúnderi jol ústinde qalǵan otyz shaqty jolaýshy qutqarylǵan. «Qutqarý operasııalary sátti ótti. Jol ústinde qalǵan jolaýshylardyń bári aman-esen jylý pýnktterine ornalastyryldy. Erteńinde úılerine jetkizilip, týystarymen qaýyshty», deıdi departamenttiń baspasóz hatshysy Ý.Dosanov.
Aıazdy kúnderi oblysta júk kólikteri men jolaýshylar avtobýsy sııaqty dızel otynmen qozǵalatyn avtokólikterdiń bárine jolǵa shyǵýǵa tyıym salyndy.
Qubyrlar syr berip jatyr
10 qańtardyń qaqaǵan keshinde Qostanaı aýdanyna qarasty Zarechnyı aýylyndaǵy birtalaı úı jylýsyz qaldy. Aýdan ákimdiginiń ókilderi muny aýa raıynyń qolaısyzdyǵymen baılanystyryp, «aıazdyń áserinen gaz qubyryndaǵy qysym kúrt tómendep ketken» dep túsindirdi. Abyroı bolǵanda, 2-3 saǵattyń ishinde qubyrdyń aqaýy jóndelip, turǵyn úıler jylý júıesine qosyldy.
Aýa raıynyń áseri me, áıteýir aıaz kúsheıgen saıyn, Qostanaı qalasynda da sý, jylý qubyrynyń jarylýy jıilep ketti. Qala ákimdiginiń málimetinshe, qys túskeli «iKomek» qyzmetine turǵyndardan 699 qońyraý kelip túsken. Turǵyndardyń 427-si jylýdyń múlde joqtyǵyn, 225 adam jylýdyń álsiz ekenin aıtyp shaǵymdanǵan. Al 40 shaqty turǵyn qubyrdyń aqaýyn jóndep berýdi ótingen.
Qalanyń eski shaǵyn aýdandaryn aıtpaǵanda, jańa boı kótergen «Aeroport» shaǵyn aýdanyndaǵy qubyrlardyń jıi jarylýy úırenshikti kóriniske aınalǵan. Jaýapty mekeme ókilderiniń aıtýyna qaraǵanda, bul shaǵyn aýdanda qubyr tóseý jumystary durys júrgizilmegen, nátıjesinde tóselgenine kóp bola qoımasa da, qubyr júıesi shirı bastaǵan.
Qystyń ortasynda qalanyń keıbir kóshelerin sý basyp jatqanyn da aıtpaı ketýge bolmaıdy. Mysaly, 11 qańtarda tún jarymda Qostanaıdaǵy Shaıahmetov kóshesinde ornalasqan №166 turǵyn úıdiń janyndaǵy sýyq sý qubyry jarylyp, nátıjesinde sol mańaıdaǵy birneshe jeke úıdiń aýlasyn sý basyp qaldy.
– Apat ornynda túni boıy 16 tehnıka, 25 adam jumys istedi. Apat ornyna qala ákimi baryp, turǵyndarmen kezdesti. Bir úıdiń turǵyndary ýaqytsha baspanaǵa kóshiriledi. Qalǵan turǵyndar biz usynǵan páterden bas tartty, – dedi qala ákiminiń orynbasary Almat Ismaǵulov.
Mamandardyń aıtýynsha, 1970 jyly tóselgen eski shoıyn qubyr qatty aıazǵa shydamaı jarylyp ketken. Ákimdiktegiler taıaý arada turǵyndarǵa kelgen zalaldy óteý boıynsha tólemder júrgiziledi degen ýáde berip otyr.
Qostanaı oblysy