Bir qaraǵanda arhıv – jandy tirliktiń jansyz deregi syndy. Biraq bul syrt kózge ǵana. Asylynda, arhıv álemi tereńine boılap, jiti úńiletin zerdeli ıesine kezikse, oǵan da til bitip sóıleıdi. Sodan ǵoı, arhıvti shejire-kenish deıtinimiz.
Memlekettik arhıv qoryna qatysty qujattar búkil halyqtyń ortaq dəýleti. Onyń muqııat suryptalyp, ekshelip, aqaý kórmeı saqtalýyna jaǵdaı týǵyzý – ərbir mekeme men uıymnyń mindeti. Sol mindetti kóterip júrgen Astana qalasynyń memlekettik arhıvi búginde oqýshylarmen tyǵyz jumys istep jatyr. Jaqynda olar «Qadyr Myrza Áli» atyndaǵy BINOM SCHOOL mektep-lıseıiniń oqýshylaryn qonaqqa shaqyryp, tarıhı derektermen tanystyrdy.
Aldymen mekeme qyzmetkerleri oqýshylarǵa arhıv qoımasyn aralatyp, «XX ǵasyrdyń 20-30 jyldaryndaǵy Qazaqstan» taqyryby boıynsha qundy qujattardy kórsetti. Munda keńes ókimetiniń Qazaqstanda ornaýy, Alash partııasynyń qyzmeti, 1930-1940 jj. qýǵyn-súrgin, Qyrǵyz (Qazaq) AKSR-niń qurylýy, Qazaq KSR-niń qurylýy týraly mańyzdy maǵlumattar usynyldy.
Arhıv qoımasynyń qyr-syrlarymen tanysý barysynda jas oqyrmandarǵa kóne qoljazbalardyń qalaı saqtalǵany jaıynda aqparattar berildi. Sondaı-aq elordanyń ejelgi tarıhy baıandaldy.
Kezdesý sońynda qalalyq arhıv ujymy jas qonaqtarǵa jańadan jaryq kórgen «Qaraqoıyn bolysyna qatysty keıbir arhıv derekteri jınaǵy» kitabyn syıǵa tartty.