Almatylyq mektep oqýshylarynyń sany jyl saıyn ortasha eseppen 12-14 myńǵa kóbeıip keledi. Onyń sebebin demografııa jáne ishki mıgrasııa esebimen baılanystyrǵan Almaty qalasy ákiminiń orynbasary Ásem Núsipova óńirlik kommýnıkasııalar qyzmetindegi brıfıngte oryn jetispeýshiliginiń aldyn alýǵa baılanysty atqarylyp jatqan sharalarǵa toqtaldy.
Spıkerdiń málimetine súıensek, búginde ońtústik astanadaǵy 310 mektepte barlyǵy 320 453 oqýshy bilim alýda (212 memlekettik mektepte – 292 099 oqýshy, 98 jekemenshik mektepte – 28 354 oqýshysy bar). Búginde oqýshy oryndarynyń tapshylyǵy óte ózekti máselelerdiń qatarynda tur. Qalada qazirgi jaǵdaıda 27 935 oryn jetispeıdi.
Osyǵan baılanysty bıyl 8 100 oryndyq 5 memlekettik mektep paıdalanýǵa berildi (1 800 oryn – «Qalqaman» shaǵyn aýdanyndaǵy №206, 1 800 oryn – «Saıaly» shaǵyn aýdanyndaǵy №204, 1 500 oryn – «Tomırıs» shaǵyn aýdanyndaǵy №205, 1 500 oryn – «Qalqamandaǵy» №208, 1 500 oryn «Nurkent» shaǵyn aýdanyndaǵy №209 mektepter). Sonymen birge «Mádenıet» shaǵyn aýdanynda úsh aýysymdaǵy №196 mekteptiń ornyna 1 500 oryndy qamtıtyn jańa mektep, 2 393 oryndy qamtıtyn 6 jekemenshik mektep berildi (Bostandyq aýdanynda – 599 oryndyq «Zaman» mektebi, 384 oryndyq «JOO High School Almaty», 540 oryndyq Almaty School of Physics and Mathematics, Túrksib aýdanynda – 420 oryndyq Millennium mektebi, Naýryzbaı aýdanynda – 200 oryndyq AiDi Education, 250 oryndyq Zhiger S mektepteri). Qoldanystaǵy mektepterde 900 oryn (№191, №146, № 125 qoldanystaǵy mektepterdiń árqaısysyna qosymsha 300 orynnan berilip, 600 orynǵa arnalǵan 1 ǵımarat satyp alyndy. Osylaısha, 13 493 oqýshy ornyna arnalǵan 16 nysan iske qosylyp otyr. Al jyl sońynda «Darhan» shaǵyn aýdanynda 1 500 oryndyq №210 jáne «Alma sıtı» shaǵyn aýdanyndaǵy 1 200 oryndyq №207 jańa mektep paıdalanýǵa beriletin bolady.
«Jaıly mektep» Ulttyq jobasynyń qalaı júzege asyp jatqandyǵyna toqtalǵan spıker 2030 jylǵa qaraı bir aýysymdyq oqytýǵa qol jetkiziletinin atap ótti. Osy oraıda Á.Núsipova «Ulttyq joba aıasynda 2023 jyldan bastap respýblıkalyq bıýdjet esebinen 37 100 oryndy qamtıtyn 22 mekteptiń qurylysyn bastaý josparlanǵanyn jetkizdi. Bul rette jergilikti bıýdjet esebinen jalpy somasy 11 mlrd teńgege jer telimderin satyp alý jáne olardy ınfraqurylymǵa qosý máseleleri sheshiletinin atap ótti. Sonymen qatar ákimdik «1000 mektep» jobasyn júzege asyrý jalǵastyra beredi. 2023-2025 jyldar aralyǵynda 27 150 orynǵa arnalǵan 36 bilim berý nysany (3 memlekettik mektep, 7 qosymsha qurylys, 19 jekemenshik mektep) paıdalanýǵa beriledi.
Bıyldan bastap 7 myńnan astam oqýshy mektepterge arnaıy kólikpen barady. Almaty qalasynyń ákimdigi osylaısha «Mektep avtobýsy» jobasy aıasynda turǵyndardy tolǵandyrǵan máseleniń birin sheshýdi qolǵa alyp otyr.
«Almatyda oqýshylardy tasymaldaýdyń jaılylyǵy men qaýipsizdigin arttyrý maqsatynda osy jyldan bastap qalanyń 8 aýdanyndaǵy 29 mektepte 7,7 myń balaǵa arnalǵan «Mektep avtobýsy» jobasy bastaldy» dep habarlady Almaty qalasy ákiminiń orynbasary Ásem Núsipova.
Ol jańa jyldan bastap mektepterde keshendi qaýipsizdik júıesi engizilip, «panıka túımeleri», ótý júıesi (týrnıketter), órt qaýipsizdigi, polısııanyń jedel basqarý ortalyqtarymen biriktirilgen beınebaqylaý kameralary ornatylatynyn atap ótti. Joba úsh jyldyq servıstik úlgi boıynsha qarjylandyrylady. Qarjylandyrýdyń jalpy kólemi 4,9 mlrd teńgeni quraıdy. 2023 jylǵa arnalǵan bıýdjet jobasynda osy maqsattarǵa 1,6 mlrd tenge bólinbek.
Zamanaýı ınfraqurylymdy jaqsartý arqyly 2025 jylǵa deıin barlyq memlekettik mektepter fızıka, hımııa, bıologııa, ınformatıka jáne robottehnıkanyń jańa býynynyń pándik kabınetterimen qamtamasyz etiledi. Bıyl jańa modıfıkasııadaǵy 168 shkaf satyp alý kózdelgen, bul maqsatqa jergilikti qordan 2,1 mlrd teńge bólindi.
Endigi kezekte ata-analar úshin alańdaýǵa negiz joq. Qalalyq ákimdik balalardy mektepke qaýipsiz jetkizýmen qatar, zamanaýı talaptarǵa saı bilim alýyn jaqsartýdy ýáde etip otyr. Al ata-analar jobanyń ómirsheńdigi men sapaly iske asqanyn qalaıdy.
ALMATY