2023 jyldyń 15 qańtarynda Qarataý qalasynyń polısııasyna 2 jasar balanyń úıinen joǵalyp ketkeni týraly habarlama kelip túsken, dep jazady Egemen.kz Polisia.kz-ke silteme jasap.
Balanyń anasy ony ájesimen birge qaldyryp, dúkenge ketkenin, al qaıtyp oralǵanda ony úıinen tappaǵanyn aıtty. Osy derekke qatysty QR QK-niń 125-baby 2-bóligi 5-tarmaǵymen (Adam urlaý) sotqa deıingi tergeý isi bastaldy. Jambyl oblysy Polısııa departamentiniń basshylyǵy jedel túrde izdestirý is-sharalaryn júrgizýge Qarataý qalasyna barǵan.
«Habarlama túsken sátten biz balany izdeýge kiristik. Izdestirý sharalaryna 80 polısııa qyzmetkeri, 50-den astam eriktiler jáne aýdannyń qamqor turǵyndary jumyldyryldy. Biz qalanyń ár buryshyn aralap, barlyq jertóleler men úılerdiń shatyrlaryn qaradyq. Eń basty tilegimiz balany tiri jáne saý tabý boldy», dedi Talas APB JPQb kámeletke tolmaǵandar jónindegi ýchaskelik ınspektory polısııa kapıtany Janǵalı Kópjasarov.
Jedel-izdestirý is-sharalarynyń nátıjesinde bala meshitte tabylyp, Talas aýdanynyń ortalyq aýdandyq aýrýhanasyna jetkizildi. Medısınalyq tekserý barysynda baladan eshqandaı jaraqat belgileri anyqtalǵan joq. Polısııa qyzmetkerlerimen anyqtaý jumystary barysynda anasy bolmaǵan kezde tanys ájeler páterge kelip, alkogol ishkeni belgili boldy. Balanyń qatty jylaǵanyn estigen páter qonaqtarynyń biri qatty mas kúıinde ony kórpege orap, jaqyn mańdaǵy meshitke aparǵan.
Qazirgi ýaqytta bolǵan oqıǵanyń mán-jaıyn anyqtaý úshin qajetti tergeý amaldary júrip jatyr.