Almatyda ótken jyly qalta urlyǵy men kólik salonynan urlyq jasaý azaıǵan, dep habarlaıdy Egemen.kz.
Qalalyq krımınaldyq polısııanyń málimetinshe, qoǵamdyq oryndardaǵy urlyq ótken jyldyń sáıkes kezeńimen salystyrǵanda 6,6 paıyzǵa qysqarǵan. Sonymen qatar qalta urlyǵy 2,0%-ǵa, kólik salonynan urlyq jasaý 63,6%-ǵa azaıǵan.
«Avtokólikterden urlyq jasaý áınekti syndyrý, kilt tańdaý, qulypty buzý jáne erkin kirý arqyly jasalady. Sondaı-aq páter tonaý derekteri boıynsha 136 epızodtan astam urlyq jasaǵany dáleldengen 33 qylmystyq toptyń qylmystyq áreketteri toqtatyldy. Avtokólikterdiń qulpyn buzý, áınekti syndyrý jáne bólshekteý arqyly urlyqpen aınalysqan 20 top ustaldy», delingen habarlamada.
Budan bólek qoǵamdyq oryndarda, saýda ortalyqtarynda, bazarlarda, qoımalarda, kompıýterlik klýbtarda jáne basqa da oryndarda jeke múlikti urlaýmen aınalysqan 153 toptyń áreketi toqtatylǵan. Bul rette bótenniń múlkin urlaýdyń 638 deregin jasaǵany úshin kináli dep tanylǵan 391 ury ustalǵan.