Jas kelse – iske! Eki qoly saý adam erinbese eńbektiń kiltin tabady. Bul rette jetisýlyq jastardy maqtanyshpen aıtýǵa bolady. Máselen, Aqsý aýdanyna qarasty Saǵakúres aýylynda 26 jastaǵy jas kásipker otbasylyq kásip ashyp, nan ónimderin óndirip otyr. Aýyldastary dán rıza. Onyń naýbaıshylyqpen aınalysýyna memleketten berilgen grant túrtki bolǵan.
Aqsý aýdandyq Jumyspen qamtý ortalyǵynda jumyssyz retinde tirkelgen Aıdos Jumanov byltyr «Bıznes-Bastaý» baǵdarlamasy boıynsha kásipkerlik negizderin meńgerip, sertıfıkat alyp shyǵady. Sodan soń óziniń daıyndaǵan bıznes jobasyn qorǵap, sonyń nátıjesinde 1,2 mln teńgeden astam soma qaıtarymsyz grantqa ıe bolady. Áıel zatynyń tirligi dep sógersiz, biraq jas kásipker bul qarajatqa nan pisiretin pesh, qamyr ıleıtin mashına men nan qalyptaryn satyp alady. Sóıtip 2022 jyldyń mamyr aıynda berekeli kásibin bastap, qazir aqsýlyq aǵaıyndy bólke nanǵa toıdyryp otyr. Eńbektiń nany tátti degen – osy.
«Bizdiń aýylǵa nan dúkenderge syrt jaqtan jetkiziledi. Qystyń aýa raıy qolaısyz kúnderi nan ákelinbeı qalatyn kúnder jıi bolady. Sondyqtan aýylda osy naýbaıshylyq kásip ashsam dep oıladym. Oıymdy otbasyma aıtqanda, olar qýana qoldady. Sóıtip «Bıznes-Bastaý» arqyly oqyp, grant alyp, kerekti qural-jabdyqtarǵa qol jetkizdim. Muny otbasylyq bıznes desem de bolady. Úıde bólke nan pisirýdi anam, aǵam, qaryndasym, bárimiz birge atqaramyz. Qazirgi qysqy merzimde ónimdi tek aýyldyń ishinde ótkizemiz. Al jazǵy ýaqyttarda Jansúgirov, Qarashilik sııaqty jaqyn mańdaǵy aýyldarǵa da jetkizemiz», deıdi A.Jumanov.
Búginde shaǵyn kásip ıesi kúnine orta eseppen 150 bólke nan pisirip satady. Al jazǵy ýaqytta tapsyrys kólemi ulǵaıady. Bul rette aıanbaı eńbek etý kerek. Qarajat aınalymyn arttyrǵannan keıin Aıdostyń nan ónimi túrlerin kóbeıtpek oıy bar. Jas jigittiń eńbekqorlyǵyna súısinip qaıttyq.
Jalpy, Jetisý oblysynda kásipke úıir jastardyń qatary kóp. Máselen, Eskeldi aýdanynyń turǵyny Káýsar Nurdanǵazy da memlekettik baǵdarlamanyń ıgiligin kórip, omarta sharýashylyǵymen aınalysyp otyr. Osydan 4 jyl buryn isti alǵash 10 uıamen bastaǵan kásip ıesi byltyr 1 mln 225 myń teńgeniń grantyna taǵy 21 ara uıasyn satyp alǵan. Az ýaqyttyń ishinde ara uıasynyń sanyn 80-ge jetkizgen. Grantqa ıe bolǵannan keıin kásibine degen senimi eselenip, ónimderin «Jambo» brendimen shyǵara bastapty. Búginde bal ónimderin otbasyna ǵana emes, ózi turatyn Jetisý aýylynyń turǵyndaryna da usynyp otyr.
Jalpy, oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetine qaraǵanda, 2022 jyly memlekettik grant úshin 840,9 mln teńge bólingen. Sonyń nátıjesinde bir jylda 617 adam bıznes jobasyn qorǵap, grantqa ıe boldy, ıaǵnı bul – jospardyń 90 paıyzy. Atap ótsek, memlekettiń osyndaı kómegimen shaǵyn kásibin bastaǵandardyń 212-si – jastar. Demek, jetisýlyq jas kásipkerlerdiń eńbegin baǵalaýǵa bolady.
Jetisý oblysy