Syrtqy saýda saıasaty jáne ekonomıkalyq uıymdarǵa qatysý máseleleri jónindegi vedomstvoaralyq komıssııa pııaz eksportyna 3 aı merzimge tyıym salý týraly sheshim qabyldady. Bul pııazdyń Qazaqstannan jappaı shyǵarylýyn boldyrmaý jáne onyń baǵasyn turaqtandyrý úshin jasaldy, dep habarlaıdy Egemen.kz AShM baspasóz qyzmetine silteme jasap.
Úshinshi elderdiń qazaqstandyq pııazǵa degen suranysy Azııa men álemdegi eń iri pııaz óndirýshilerdiń biri - Pákistandaǵy tabıǵı apattarmen baılanysty. Bul eldegi sý tasqyny álemde, onyń ishinde bizdiń eldiń naryǵynda pııaz baǵasynyń ósýine ákeldi.
Qazaqstannyń ońtústik óńirlerinde, sondaı – aq О́zbekstanda ónimniń qatty aıazda úsip ketýi onyń qunyna qosymsha salmaq bolyp otyr. Osylaısha pııazdyń negizgi óndirýshileri endi qazaqstandyq ónimdi belsendi túrde ımporttap jatyr.
Sonymen qatar Ulttyq statıstıka bıýrosynyń málimeti boıynsha, 2022 jyly eldegi pııazdyń ónimi 1,1 mıllıon tonnany qurady. Bul rette qazaqstandyqtar jyl saıyn bul kólemnen 3 ese az, ortasha eseppen alǵanda 315 myń tonna tutynady.
Ákimdikterdiń derekterine sáıkes búgingi kúni elimizde pııazdyń rastalǵan qory 152,4 myń tonnany quraıdy, bul ótken jylǵy eginniń jalpy kóleminiń 14% ǵana. Bul kólem jańa ónim jınalǵanǵa deıin jetkilikti, sondyqtan eksportqa engizilgen shekteýler Qazaqstannan qalǵan pııazdy áketý táýekelderin boldyrmaıdy.
Aıta ketý kerek, respýblıkada pııazdyń kóterme baǵada bir kelisi 150-170 teńgeni quraıdy, al kórshiles Reseı men О́zbekstanda baǵa 240 teńge kóleminde turady. Sonymen qatar Qaztrade málimetteri boıynsha, О́zbekstan men Tájikstan óz elderinde pııaz eksportyna shekteý qoıǵan bolatyn.
Úkimet jaqyn arada naryqtyq jaǵdaıdy jaqsartý kezinde barlyq shekteýlerdi ýaqytyly alyp tastaý úshin eldegi jáne álemdegi jaǵdaıdy muqııat qadaǵalaıdy.
Fermerler úshin pııaz eksportyna tyıym salýdyń jaǵymsyz saldaryn azaıtý úshin búgingi kúni aýyl sharýashylyǵy taýaryn óndirýshilerden pııazdy ÁKK arqyly turaqtandyrý qorlaryna, sondaı-aq saýda jelileri arqyly aınalym shemasy arqyly satyp alýdyń ártúrli tetikteri iske asyrylyp jatyr.