Keıingi bir jyl ishinde Batys Qazaqstan oblysynda 3 úshem, 78 egiz bala dúnıege kelgen. Al jańa jyldyń alǵashqy kúnderi jaryq dúnıe esigin ashqan Aınaz, Aızada, Aıdana oblystyq perınataldyq ortalyqtan aman-esen shyǵyp, endi úıindegi ata-ájesin qýantady.
Úshem 3 qańtar kúni saǵat 20.00-de aralaryna bir mınýt salyp ómirge kelgen eken. Sol sáttegi salmaǵy – 2279, 2240 jáne 2700 gramm bolǵan. Oral qalasynda turatyn Talap Boranǵalıev pen Jadyranyń buǵan deıin de úsh balasy bolǵan. Bir kúnde kópbalaly otbasy, kúmis alqa ıegeri atanǵan 39 jastaǵy Jadyranyń da, kishkentaı sábılerdiń de jaǵdaıy jaqsy.
Kelinshektiń tolǵaǵy merziminen buryn bastalǵandyqtan, sábıler kesar tiligi arqyly ota jasalyp alynǵan. Úshemniń salmaǵy qalypty deńgeıge jetkenshe oblystyq perınataldyq ortalyqta dáriger baqylaýynda bolypty.
«2022 jyly Batys Qazaqstan oblysynda jalpy sany 6116 sábı dúnıege keldi. Sonyń ishindegi shala týǵandar sany 507 boldy. Bizdiń dárigerler 700 gramm salmaqpen týǵan sharananyń da ómirin saqtap qala aldy. Búgin bizdiń bólimsheden shyǵyp jatqan úshem men anasynyń da jaǵdaıy qalypqa keldi. Endi olar qaladaǵy №6 perzenthananyń qamqorlyǵynda bolady», deıdi Batys Qazaqstan oblystyq perınataldyq ortalyǵy náresteler patologııasy bólimshesiniń meńgerýshisi Ásel Nyǵmetova.
Batys Qazaqstan oblysy