Qurlyqtyq hokkeı lıgasynda (QHL) baq synaıtynyn elordanyń «Barysy» kezekti týr oıynyn «Barys Arenada» ótkizip, Novosıbırskiniń «Sıbır» komandasynan jeńilip qaldy.
Keıingi úsh matchtaǵy sátsizdikten keıin Andreı Skabelka bul joly «Barystyń» negizgi quramyna azdaǵan ózgeris engizip, jeńiske jetýdiń kiltin izdep kórgen edi. Alaıda onysynan túk shyqqan joq. Elordadaǵy kezdesýdiń alǵashqy bóligin jerlesterimiz sátti ótkizdi. Birinshi kezeńniń altynshy mınýtynda Anton Sagadeev alystan dál soqqy jasap, matchtyń esebin ashqan bolatyn. Alaıda úziliske sanaýly mınýttar qalǵanda qonaqtar tarazy basyn teńestirip ketti. Goldyń avtory – Denıs Golýbev.
Ekinshi kezeńde «Barys» oıynshylary basymdyq tanytqanymen, tablodaǵy esepti ózgerte almady. Al úshinshi kezeńde «Sıbır» oıynshylary myqtylyq tanytty. 42-mınýtta Aleksandr Sharov mergendik tanytyp, oıynnyń núktesin qoıdy – 2:1. Osylaısha, «Barys» qatarynan tórtinshi matchta jeńildi. Jerlesterimiz kelesi kezdesýin erteń Chelıabide jergilikti «Traktormen» ótkizedi.