Qaraǵandy medısınasy erteden elge máshhúr. Kásibiı ári joǵary bilikti mamandarynyń ataǵyna sonaý keńes kezinde-aq shartaraptaǵylar qanyq-tyn. Birden-bir tanymal tulǵalar talaı dertke daýa tapqany belgili. Búginde sol abyroı bıiginen Qaraǵandy óńiriniń dárigerleri bir súıem de tómen túspedi. Zaman talabyna saı jańa tehgologııalar kómegimen bir kezderi kúrdeli sanalǵan operasııalardy sátti jasap keledi. Laparoskopııa – osy kúni qaraǵandylyq dárigerler keń qoldanatyn tásil. Toqishek patologııasy, shap jaryǵy sekildi dertterdi emdeýde laparaskopııa tásili tanymal.
Jaqynda Qaraǵandy oblystyq klınıkalyq aýrýhanasynda toqishek patologııasy bar naýqastarǵa laparoskopııa jasaldy. Qaraǵandylyq jáne ózge de shetel dárigerlerine bul sheberlik sabaǵyn máskeýlik hırýrg Artem Goncharov ótkizdi. Qaraǵandy oblystyq densaýlyq saqtaý basqarmasynyń baspasóz qyzmeti habarlaǵandaı, Artem Goncharov jasaǵan úsh tómen ınvazıvti operasııa tikeleı translıasııalanǵanyn atap ótken jón.
Birinshi operasııa stomasy bar naýqasqa jasaldy. Hırýrgtiń aldynda syrtqa shyǵyp ketken ishektiń bir bóligin ishke qaıtaryp, onyń qyzmetin qalpyna keltirý mindeti turdy.
– Ol úshin qabyrǵany sógip, ádettegideı dástúrli operasııa jáne laparoskopııa arqyly maqsatqa jetýge bolady. Laparoskopııada kishkentaı tilikter ǵana jasalady. Onyń ústine, laparoskopııa adamnyń jyldam jazylýyna yqpal etedi. Asqynýlardyń aldyn alady, kosmetıkalyq turǵyda jaqsy nátıje kórsetedi, – deıdi Reseı Federasııasy Prezıdenti Is basqarmasynyń Ortalyq klınıkalyq aýrýhana jáne emhanasynyń koloproktologııa bóliminiń meńgerýshisi Artem Goncharov.
Qaraǵandy dárigerleriniń aıtýynsha, toqishekke kúrdeli otalardy ashyq túrde jasap kelgen. Endi máskeýlik hırýrgtiń sheberlik saǵaty laparoskopııalyq ádistiń kókjıegin keńeıte túskenin jasyrmady.
– Bul operasııa laparoskopııanyń jańa múmkindikterin kórsetti. Toqishekke buryn kúrdeli operasııalardy ashyq túrde jasaıtyn edik. Endi keıbir máselelerdi talqylaýdan soń laparoskopııalyq tehnologııa qoldanylatyn bolady, – deıdi Qaraǵandy oblystyq klınıkalyq aýrýhana dırektorynyń hırýrgııa jónindegi orynbasary Borıs Shaı.
Aıtalyq, bul kúnderi Qaraǵandyda shap jaryǵyn laparoskopııamen emdeıdi. Qaraǵandy dárigerleri osyndaı jeti operasııa jasaǵan. Qaraǵandy qalasynyń №1 kópsalaly aýrýhanasyndaǵy operasııalar sátti ótkenin aıtady dárigerler. Olar shap jaryǵy asqynbaǵan jaǵdaıdyń toqsan paıyzynda laparoskopııaǵa júginetindikterin jetkizdi.
– Barlyq operasııa sátti boldy. Bizdiń aýrýhanadaǵy laparoskopııalyq ádis – asqynbaǵan shap jaryǵyn emdeýdiń altyn standartyna aınalýda. Naýqastardyń 90%-yna laparoskopııalyq operasııa jasaýǵa tyrysamyz. Operasııa barysynda ozyq quraldar qoldanylady. Atap aıtqanda, amerıkalyq óndiristiń eń joǵary sapaly torly ımplanttary paıdalanylady. Laparoskopııany qoldaný pasıentter úshin jaraqat alý qaýpin azaıtady. Sonymen birge ońalý ýaqyty jyldam, – deıdi № 1 kópsalaly aýrýhananyń hırýrgııa bóliminiń meńgerýshisi Arastýn Musaev.
Mundaı operasııa jasaýǵa bir saǵat ýaqyt ketedi eken. Operasııa jasalǵan kúni-aq naýqas tóseginen turyp, júre alady. Al otadan soń úshinshi-tórtinshi kúni aýrýhanadan shyǵady.
Taǵy bir atap aıtarlyǵy, bul operasııalar mindetti medısınalyq saqtandyrý aıasynda jasalady. Oǵan tólenetin qarjy medısınalyq saqtandyrý qorynan beriledi. Medısınalyq saqtandyrý qorynyń Qaraǵandy fılıalynyń málimdeýinshe, osy operasııanyń árqaısysyna 150 myń teńgeden astam qarajat aýdarylǵan.
Qaraǵandy oblysy